Nashik Crime: नाशिकमध्ये पाईकराव टोळीने केरला अण्णा टोळीच्या सदस्याच्या घरी सशस्त्र हल्ला चढवत दहशत निर्माण केल्याने दोन्ही टोळ्यांमध्ये तणाव निर्माण झाला आहे. नाशिकरोड पोलिसांनी तातडीने कारवाई करत सहा संशयितांना अटक केली असून उर्वरित आरोपींचा शोध सुरू आहे.
मंदा जारस (वय ४०, रा. भारती मठ, सुभाषरोड, नाशिकरोड) यांच्या फिर्यादीवरून हर्षल म्हस्के उर्फ टोन्या पाईकराव, मयूर जानराव, प्रथमेश कसबे उर्फ मोठ्या, बबलू यादव, धनंजय म्हस्के, दानिश शेख, ऋषी पवार, तुषार सावंत, अवि जाधव, सन्या, दुर्गेश पगारे, तुषार पाईकराव, विराज कांबळे यांच्याविरोधात नाशिकरोड पोलिसांत गुन्हा दाखल करण्यात आला. मंदा जारस या त्यांची बहीण दीपाली यांना पुण्याला जायचे असल्याने मंगळवारी पहाटे पावणेपाचला तयारी करीत होत्या. याचवेळी तेरा संशयित त्यांच्या घरी आले. फिर्यादीचा मुलगा आदित्य जारस उर्फ बिल्ला हा कुठे आहे, केरला अण्णाच्या जीवावर तो खूप उड्या मारतो, त्याला जिवंत सोडणार नाही, अशी धमकी देत टोण्या आणि त्याचे काही साथीदार घरात घुसले.
प्रथमेश कसबे याने मंदा जारस यांच्याकडील तेराशे रुपये हिसकावून घेतले. मंदा यांनी आरडाओरडा केल्याने शेजारील गायत्री राजू जॉन, भरत वाघ, मीरा वाघ घराबाहेर आले. हर्षल, मयूर, प्रथमेश व विराज यांनी गायत्री जॉन यांचा मोबाइल हिसकवला. पोलिसांनी किर्लोस्कर टेकडीत छापा मारत मयूर जानराव, धनंजय म्हस्के, ऋषी पवार, तुषार सावंत, अभिनव जाधव आणि एक अल्पवयीन अशा सहा संशयितांना अटक केली. त्यांच्याकडून धारदार लोखंडी कोयते, चॉपर जप्त केले. उर्वरित मुख्य संशयित फरार आहेत.
लेखकाबद्दलअक्षय शितोळेअक्षय शितोळे | २०१८ पासून डिजिटल मीडियात कार्यरत असून सध्या मटा ऑनलाइनमध्ये प्रिन्सिपल डिजिटल कंटेंट प्रोड्युसर म्हणून जबाबदारी सांभाळत असताना राज्यभरातील रिपोर्टर्ससोबत समन्वय साधण्याचेही काम करत आहे. राजकीय बातम्यांमध्ये विशेष रस, बातम्यांमागची बातमी अर्थात घडामोडींचा विश्लेषणात्मक आढावा घेण्याचा सातत्याने प्रयत्न असतो. शेती आणि ग्रामीण जीवन हे जिव्हाळ्याचे विषय आहेत. यापूर्वी लोकमत, न्यूज १८ लोकमत आणि एबीपी माझा या संस्थांमध्येही कामाचा अनुभव असून मुंबईतील रूईया महाविद्यालयातून पत्रकारितेत पदवी प्राप्त केली आहे.… आणखी वाचा