Sangli Crime: सांगलीत एका तरुणाने प्रेयसीला वाढदिवसाची भेट देण्यासाठी जबरी चोरी केली असून याप्रकरणी दोन आरोपींना अटक करण्यात आली आहे. आरोपींनी एका वृद्ध महिलेच्या घरातून सोन्याचे दागिने चोरल्याचं उघड झालं आहे.
प्रेयसीला वाढदिवशी भेटवस्तू देण्यासाठी जबरी चोरी केल्याप्रकरणी अटक केलेल्या पार्श्व अनिल माणगावकर (वय १९, रा. खंडेराजुरी, ता. मिरज) व हृषीकेश मोहन पाटणे (२२, रा. हरिपूर, ता. मिरज) या दोघांना न्यायालयाने दोन दिवसांची पोलिस कोठडी सुनावली.
मिळालेल्या माहितीनुसार, पार्श्व माणगावकर याच्या प्रेयसीचा वाढदिवस असल्यामुळे तिला भेटवस्तू देण्यासाठी त्याला पैशांची गरज होती. त्यामुळे त्याने हरिपूर येथील मित्र हृषीकेश पाटणे याच्या मदतीने चोरी करण्याचा कट रचला. हरिपूर येथील वनिता रामचंद्र रहाटे (वय ७०) ही वृद्ध महिला घरात एकटीच असताना पार्श्व हा पाणी पिण्याचा बहाणा करून घरात आला. त्यानंतर त्याने रहाटे यांच्या गळ्याला चाकू लावून त्यांची सोन्याची माळ आणि कर्णफुले असा १ लाख ५५ हजार रुपयांचा ऐवज चोरून पलायन केले.
दरम्यान, याबाबत रहाटे यांनी सांगली ग्रामीण पोलिसांना हा प्रकार कळवला. त्यानंतर पोलिसांनी वेगाने चक्रं फिरवत आरोपींचा शोध सुरू केला होता. अखेर पोलिसांनी संशयितांना ताब्यात घेतले असून दोघांची कसून चौकशी केल्यानंतर त्यांनी कबुली दिली. याप्रकरणी पोलिसांकडून अधिक कारवाई केली जात आहे.
लेखकाबद्दलअक्षय शितोळेअक्षय शितोळे | २०१८ पासून डिजिटल मीडियात कार्यरत असून सध्या मटा ऑनलाइनमध्ये प्रिन्सिपल डिजिटल कंटेंट प्रोड्युसर म्हणून जबाबदारी सांभाळत असताना राज्यभरातील रिपोर्टर्ससोबत समन्वय साधण्याचेही काम करत आहे. राजकीय बातम्यांमध्ये विशेष रस, बातम्यांमागची बातमी अर्थात घडामोडींचा विश्लेषणात्मक आढावा घेण्याचा सातत्याने प्रयत्न असतो. शेती आणि ग्रामीण जीवन हे जिव्हाळ्याचे विषय आहेत. यापूर्वी लोकमत, न्यूज १८ लोकमत आणि एबीपी माझा या संस्थांमध्येही कामाचा अनुभव असून मुंबईतील रूईया महाविद्यालयातून पत्रकारितेत पदवी प्राप्त केली आहे.… आणखी वाचा