मोबाईल लोकेशन कर्जत तालुक्यातील भिवपुरी रोड स्टेशन परिसरात मिळाल्यानं नेरळ पोलीस, नौदलाचे अधिकारी व नातेवाईक यांनी संयुक्तरीत्या शोधमोहीम राबवली. नेरळ-माथेरान परिसरातील जंगलात शोधकार्य सुरू असताना अखेर या नौदल अधिकारी यांचा मृतदेह माथेरान डोंगरातील पाली भूतिवली धरण ते गार्बेट या मार्गावरील सातोबा मंदिरामागील टेकडीवरील 50 फूट खोल दरीत मृतदेह दिसून आला. नौदल अधिकारी यांचा मृतदेह स्थानिक आदिवासी गुराखी यांना दिसून आल्यानंतर त्यांनी नेरळ पोलिसांना कळवलं.

टँकरमध्ये उतरून वेल्डिंग करताना भीषण स्फोट, युवकाचा आतच होरपळून मृत्यू; संभाजीनगर हादरलं

मोठ्या जंगल व दुर्गम परिसरातून सह्याद्री रेस्क्यू टीमने त्या ठिकाणी पोहोचून मृतदेह बाहेर काढण्याचं काम सुरू केलं. पोलिसांनी प्राथमिक तपासानंतर हा मृतदेह नौदल जवान सुरजसिंह चौहान यांचाच असल्याची खात्री केली आहे. नौदल अधिकारी चौहान हे 7 सप्टेंबर रोजी लोणावळा येथील डोम धरण आणि नंतर कर्जत तालुक्यातील पाली भूतिवली धरण परिसरात पुढे गार्बेट येथे जात असल्याचं त्यांच्या मोबाईल लोकेशनवरून स्पष्ट झालं. त्यांचं शेवटचं लोकेशन पाली भूतिवली धरणाच्या बाजूला माथेरान डोंगराच्या पायथ्याशी आढळून आलं होतं. त्यांनतर सकाळी सव्वाआठ वाजताच्या नंतर त्याबाबत कोणतीही माहिती मिळाली नाही. त्यांनतर सुरजसिंहच्या नातेवाईकांनी पोलिसात धाव घेतल्यावर त्यांच्या मोबाईलमधील शेवटच्या लोकेशनवरून जिल्हा पोलीस यंत्रणेकडून तपास सुरू करण्यात आला.

मात्र, आठ दिवसात त्यांचा मोबाइल सुरू झाला नाही आणि त्यामुळे मोबाईल लोकेशन मिळालं नाही. कर्जत आणि नेरळ पोलिसांकडून सुरजसिंह यांच्या तपासासाठी अनेक आदिवासी वाड्यांमध्ये पाहणी करण्यात आली. हेल्प फाउंडेशन तसेच सह्याद्री रेस्क्यू टीम अशा अनेक स्वयंसेवी संस्था सुरजसिंह यांच्या शोध मोहिमेत होते. अखेर आज सोमवारी त्यांचा मृतदेह स्थानिक आदिवासी गुराखी यांना दिसून आला. त्यानंतर त्यांनी नेरळ पोलीस ठाणे यांना त्याबाबत कळवलं. आता हा अपघात होता की घातपात? याचा तपास नेरळ पोलिस आणि नौदल अधिकारी करत आहेत. त्यांच्या मृत्यूने कुटुंबीय व सहकाऱ्यांमध्ये हळहळ व्यक्त होत आहे.