एका वर्षापासून हल्ल्याचा कट

पुणे पोलिसांच्या प्राथमिक तपासानुसार, या हल्ल्याचा कट तब्बल एक वर्षांपासून रचला जात होता. आंदेकर टोळीतील काही सदस्यांवर पूर्वी हल्ला करण्याचा प्रयत्न झाला होता. मात्र, पोलिसांच्या वॉचमुळे तो हल्ला वाचला होता. मात्र, यावेळी गणेश कोमकरचा मुलगा आयुष्य कोमकर याच्यावर जीवघेणा हल्ला करण्यात आला. टोळीतील चार सदस्यांनी आयुष्यवर गोळ्या झाडल्या. त्यापैकी दोन आरोपी यश सिद्धेश्वर पाटील आणि अमित प्रकाश पाटोळे यांना पोलिसांनी अटक केली असून, उर्वरित दोन आरोपी अद्याप फरार आहेत.
पुण्यात गँगवॉर! आंदेकर विरुद्ध कोमकर, दोन कुटुंबात टोळी युद्ध कसं सुरु झालं? वाचा रक्तरंजित इतिहास

गोळ्या घालणारे सराईत रेकॉर्डवरील आंदेकर टोळीतील गुन्हेगार

आंदेकर टोळीतील या दोघांवर यापूर्वी भादवी कलम 324, 323, 406, 32 अंतर्गत विविध गुन्हे दाखल असल्याचे पोलिसांनी सांगितले. हे दोघे टोळीचे सक्रिय सदस्य असून, त्यांना शस्त्रे पुरवणारा अमन युनूस पठाण याच्यावर देखील गुन्हा दाखल करण्यात आला आहे. आतापर्यंत या प्रकरणात एकूण 11 आरोपींवर गुन्हे दाखल झाले असून, पोलिसांकडून त्यांचा कसून शोध सुरू आहे.

आंदेकर – कोमकर गँगवॉर

पोलिसांनी दिलेल्या माहितीनुसार, हल्ला करण्यामागील मूळ कारण जुन्या वैमनस्यातून घेतलेल्या बदल्याचा भाग होता. आंदेकर टोळीतील काही जणांवर पूर्वी हल्ल्याचा कट रचला गेला होता, मात्र पोलिसांनी तो हल्ला रोखला होता. त्यानंतर टोळीतील सदस्यांनी वेगळ्या पद्धतीने हा कट रचत कोमकर कुटुंबावर हल्ला केला. या हल्ल्यामुळे परिसरात तणावाचे वातावरण निर्माण झाले असून, पोलिसांनी सुरक्षा वाढवली आहे.

या प्रकरणाचा तपास वरिष्ठ पोलिस अधिकाऱ्यांच्या देखरेखीखाली सुरू आहे. फरार आरोपींचा शोध घेण्यासाठी विशेष पथके तयार करण्यात आली आहेत. शहरातील टोळीवाद आणि शस्त्रसाठ्यावर पोलिसांनी अधिक कडक कारवाई सुरू करण्याचे संकेत दिले आहेत.