याप्रकरणी मिळालेल्या माहितीनुसार, 3 सप्टेंबर रात्री साडेबारा वाजण्याच्या सुमारास रात्री उशिरा मुकेश याच्या दुचाकीला अज्ञात वाहनाने जोरदार धडक दिली. त्यामुळे दुचाकीवरील एक तरुण जागीच ठार झाला, तर दुसरा गंभीर जखमी झाल्याची दुर्दैवी घटना घडली. गंभीर जखमी झालेल्या दुसऱ्या तरुणाचे नाव सुरज घादगे (वय वर्ष 25 राहणार खामगाव) आहे. दोघेही एमएच 28 बी वाय 0873 क्रमांकाच्या दुचाकीने तिने जात असताना चिखली फाट्याजवळ अज्ञात वाहनाने त्यांच्या दुचाकीला जोरदार धडक दिली. यात मुकेश शर्मा याचा जागीच मृत्यू झाला. तर सुरज घादगे गंभीर जखमी झाला असून त्याला तातडीने अकोला येथे उपचारासाठी हलवण्यात आले आहे. दरम्यान, महामार्गावरून समोरून आलेल्या अज्ञात वाहनाने दुचाकीला जोरदार धडक दिली. धडकेत मुकेश गंभीर जखमी झाला. उपस्थितांनी त्याला तातडीने जवळच्या रुग्णालयात दाखल केले, मात्र उपचार सुरू होण्यापूर्वीच त्याने अखेरचा श्वास घेतला.
गणेश विसर्जनाच्या मिरवणुकीत भरधाव कार शिरली, तिघांनी जीव गमावला, 22 जण जखमी
मुकेश हा गणेश मंडळातील सक्रिय कार्यकर्ता होता. गेल्या काही वर्षांपासून उत्सव व्यवस्थापन, सामाजिक उपक्रम आणि मंडळाच्या सेवा कार्यात त्याची नेहमीच हजेरी असायची. त्यामुळे मंडळातील सदस्य, मित्रपरिवार व परिसरातील नागरिक या घटनेने हळहळून गेले आहेत. विशेष म्हणजे काही दिवसांतच त्याचा विवाह ठरलेला होता. घरात लग्नाच्या तयारीचा गडबडगोंधळ सुरू असतानाच या अपघातामुळे आनंदमयी वातावरणावर शोककळा पसरली आहे.

एकीकडे ढोल-ताशांचा नाद आणि “गणपती बाप्पा मोरया”च्या जयघोषात सारा उत्सव रंगात आला असताना, अचानक आलेल्या या दुर्दैवी घटनेने सर्वांच्या डोळ्यात पाणी आणले आहे. कुटुंबीयांवर दुःखाचा डोंगर कोसळला असून परिसरातील सर्वजण त्यांच्या दुःखात सहभागी झाले आहेत. मुकेशच्या अकाली जाण्याने केवळ एक तरुण मंडळ कार्यकर्ता हरपला नसून उत्साह, मेहनत व समाजसेवेत नेहमी आघाडीवर असणारा आधारस्तंभ कायमचा हरपल्याची भावना व्यक्त केली जात आहे.

गणेश मंडळाचे पदाधिकारी घटनास्थळी

या घटनेची माहिती मिळतात चंदनशेष गणेश मंडळाचे पदाधिकारी व सदस्य चिखली फाट्याजवळ दाखल झाले होते. या घटनेनंतर हळहळ व्यक्त होत आहे. या अपघाताचा पुढील तपास पोलीस नाईक बाळकृष्ण फुंडकर करीत आहेत शोकाकुल वातावरणात मृतकावर अंत्यसंस्कार करण्यात आले.

मुकेशचा होणार होता विवाह

या अपघातातील मृत मुकेश शर्माने एमबीए केले होते. त्याचं लग्न यवतमाळच्या मुलीसोबत ठरलं होतं. नोव्हेंबरमध्ये त्याचं लग्न होणार होतं.