मनोज जरांगे यांच्या मुंबईतील आंदोलनाच्या पहिल्या दिवशी मराठा आंदोलकांची दुरावस्था झाली. आंदोलकांना चहा पाणी, नाष्टा मिळणं कठीण झालं होतं. कारण अनेक हॉटेल्स बंद होत्या. त्यावरुन सरकारवर आरोप करण्यात येत होते. अखेर यावर मुख्यमंत्री देवेंद्र फडणवीस यांनी खुलासा केला आहे.
‘काही घटना अशा घडल्या, ज्या भूषणावह नाहीत’
“कायदा-सुव्यवस्था बिघडली नाही. कारण काही घटना घडल्या. त्यानंतर लगेच पोलिसांनी अर्ध्या तासात रस्ते मोकळे केले आहेत. पण काही घटना अशा घडल्या आहेत, ज्या भूषणावह नाहीत. अशा प्रकारची अपेक्षा आंदोलकांकडून नाही. आता त्याचंही समर्थन होणार असेल तर महाराष्ट्राची संस्कृती कुठल्या दिशेला जात आहे? आपण छत्रपतींचा इतिहास सांगणारे लोकं आहोत, छत्रपतींचा इतिहास सांगत असताना आपण अशाप्रकारे वागलो की, आपण छत्रपतींचा आणि संस्कृतीचा अवमान करत आहोत का? असा प्रश्न आहे”, अशी भूमिका मुख्यमंत्र्यांनी मांडली.
फडणवीसांचा मोठा खुलासा
“पहिल्या दिवशी जो काही धुडगूस घातला ते पाहून व्यापाऱ्यांनी आपली दुकानं बंद केली. ते निघून गेले. त्यानंतर लगेच आम्हाला उपाशी ठेवण्याचा प्रयत्न केला गेल्याचा आरोप केला गेला. पण तसं कुणीही केलं नाही. त्यांनी धुडगुस घातल्यामुळे ते व्यापारी निघून गेले होते. नंतर आम्ही सांगितलं की, तुम्ही दुकानं उघडी ठेवा. आम्ही पोलीस फोर्स देतो. कुठेही चुकीचं घडणार नाही. कुठेही आम्ही काही होऊ देणार नाही. त्यांनी दुकानं आता उघडी ठेवली आहेत”, असं मुख्यमंत्री देवेंद्र फडणवीस यांनी स्पष्ट केलं.
चर्चा करायची कुणाशी? फडणवीसांचा सवाल
“चर्चा करायची कुणाशी? माईकवर चर्चा होते का? त्यांनी आम्हाला निवेदन दिलं. त्या निवेदनातून काही मार्ग निघू शकतो का याचा विचार करतोय. सरकारला कुठलीही आडमुठेपणाची भूमिका घेता येत नाही. सरकार कधीही कुठला इगो धरत नाही. त्यातून काही मार्ग काढतोय. चर्चेला कोणी समोर आलं तर लवकर मार्ग निघेल”, असं देवेंद्र फडणवीस यांनी सूचित केलं.
फडणवीसांचा विरोधकांवर निशाणा
“माझी खासदार सुप्रिया सुळे यांच्यासह सर्वांना विनंती आहे की, अशा प्रकारच्या सामाजिक प्रश्नावर राजकीय पोळी भाजणं बंद केलं पाहिजे. कारण त्यातून आपलंच तोंड पोळतं. दुसरं महत्त्वाचं लक्षात ठेवा की, खरंतर हा प्रश्न त्यांनी स्वत:ला प्रश्न विचारला पाहिजे की, मराठा समाजाचे प्रश्न इतके का चिघळले? त्यावर सोल्यूशन कोणी काढलं? त्यांच्या काळात सोल्यूशन निघालं का? उलट मध्ये अडीच वर्षाचं सरकार होतं. त्यात एकही मराठा आरक्षणाच्या बाजूने निर्णय घेतले नाही. त्यामुळे त्यांनी यावरुन आपली राजकीय पोळी भाजणं बंद करावं”, असं मुख्यमंत्री देवेंद्र फडणवीस यांनी सुनावलं.
लेखकाबद्दलचेतन पाटील“चेतन पाटील हे पत्रकार आहेत. त्यांना राजकीय, सामाजिक, शैक्षणिक, मनोरंजन आणि क्रीडा अशा विविध बीटच्या बातम्या केल्याचा अनुभव आहे. चेतन पाटील यांनी दैनिक लोकमत, न्यूज 24, जय महाराष्ट्र, आपलं महानगर, न्यूज 18 लोकमत, टीव्ही 9 मराठी अशा विविध वृत्त संस्थांमध्ये काम केल्याचा अनुभव आहे. चेतन हे जवळपास 8 वर्षांपेक्षा अधिकचा काळ माध्यम क्षेत्रात कार्यरत आहेत. त्यांनी कल्याणच्या नामांकित बिर्ला महाविद्यालयातून पत्रकारितेतील पदवी शिक्षण घेतलं आहे. त्यांना पदवीचं शिक्षण घेत असताना एका पॉलिटीकल पीआर कंपनीसोबत काम करण्याचा अनुभव आहे. सध्या ते महाराष्ट्र टाइम्स ऑनलाईन येथे कार्यरत आहेत.
चेतन पाटील यांनी केलेल्या बातमीमुळे एका निराधार वृद्ध महिलेला खूप मोठी मदत झाली. याशिवाय चेतन पाटील यांनी लिहिलेल्या अनेक बातम्यांचा पॉझिटिव्ह इम्पॅक्ट पडलेला बघायला मिळाला आहे.
चेतन पाटील महाविद्यालयात शिक्षण घेत असताना त्यांच्या ‘भगतसिंग’ कवितेची निवड अखिल भारतीय मराठी साहित्य संमेलनाच्या कवीकट्टा सदरात वाचनासाठी झाली होती. चेतन पाटील यांनी नाटकातही काम केलं आहे. त्यांनी राज्य नाट्य हौशी स्पर्धेत भाग घेतलाय. त्यांनी ‘जलरंग तापी’ नाट्य संस्थेसोबत काम करत असताना ‘नटसम्राट’ नाटकात बूटपॉलिश करणाऱ्या राजाची भूमिका साकारली होती. त्यांची ही भूमिका प्रचंड भाव खाऊन गेली होती. त्यांच्या अभिनयाने प्रभावित होऊन एका प्रेक्षकाने त्यांना खांद्यावर उचलून घेत नृत्य केलं होतं.
खूप छोट्या गोष्टींमधून आनंद शोधावा, असं त्यांचं मत आहे. त्यांना पत्रकारितेसह वाचन, लेखनाची आवड आहे. चेतन पाटील यांचं आतापर्यंतचं वैयक्तिक आयुष्य खूप संघर्षमय आणि खडतर असल्यामुळे ते फार संवेदनशील आहेत. त्यामुळे संवेदनशील बातम्या हाताळताना ते अशा बातम्यांना न्याय देण्याचा पूरेपूर प्रयत्न करतात.”… आणखी वाचा