मनसेने जारी केलेलं पत्रक काय?

प्रति,
वैभव खेडेकर, खेड, रत्नागिरी,
अविनाश सौंदळकर, राजापूर, रत्नागिरी,
संतोष नलावडे, चिपळूण, रत्नागिरी,
सुबोध जाधव, माणगाव, रायगड,
यांसी सस्नेह जय महाराष्ट्र!आपणास या पत्राद्वारे कळविण्यात येते की, आपण पक्षाच्या नियमांचे आणि धोरणांचे उल्लंघन केल्यामुळे, तसेच पक्षविरोधी कार्य केल्यामुळे महाराष्ट्र नवनिर्माण सेनेचे अध्यक्ष राज ठाकरे यांच्या आदेशाने तुम्हाला पक्षातून बडतर्फ करण्यात येत आहे. तरी महाराष्ट्र नवनिर्माण सेनेच्या सर्व पदाधिकारी महाराष्ट्र सैनिकांनी याची नोंद घ्यावी.

आपले नम्र,
महाराष्ट्र नवनिर्माण सेनेसाठी
संदीप देशपांडे, नेते
अविनाश जाधव, नेते

कोण आहेत वैभव खेडेकर?

वैभव खेडेकर हे मनसे अध्यक्ष राज ठाकरे यांचे कोकणातील महत्त्वाचे शिलेदार मानले जात. त्यांनी 2014 मध्ये दापोली विधानसभा मतदारसंघातून निवडणूक लढवली होती, मात्र त्यांना पराभवाचा धक्क बसला होता. राज ठाकरेंनी मनसेची स्थापना केल्यापासून खेडेकर त्यांच्या सोबत आहेत. इतकंच नाही तर खेड नगरपरिषद निवडून आणण्यात वैभव खेडेकर यांचा महत्त्वाचा वाटा होता. यापूर्वी वैभव खेडेकर खेडचे नगराध्यक्ष राहिले आहेत.

आंदोलनात थेट भिडणारा धडाडीचा कार्यकर्ता म्हणून खेडेकराची खास ओळख आहे. यापूर्वी त्यांचा सामना त्यांचे राजकीय गुरु, शिवसेना नेते रामदास कदम यांच्यासोबत होत असे, पण अलिकडे हा संघर्ष कमी झाला होता. युवांमध्येही वैभव खेडेकर यांचा मोठा चाहतावर्ग आहे. वैभव खेडेकर यांच्यावर मनसेच्या राज्य सरचिटणीस, कोकण संघटक पदाची मोठी जबाबदारी होती. पक्षातून त्यांना बाहेरचा रस्ता दाखवल्याने मनसेला कोकणात, रत्नागिरी जिल्ह्यात मोठा धक्का बसण्याची शक्यता आहे.