गणेशोत्सवाच्या काळात नाशिकमध्ये शिवसेना ठाकरे गटाकडून करण्यात आलेली बॅनरबाजी चांगलाच चर्चेचा विषय ठरली आहे. नाशिकच्या विनय नगर परिसरात हे बॅनर लावण्यात आले असून यावर गणपती बाप्पा आणि त्याचे वाहन मूशक उंदीर यांच्यात नाशिक शहरातील खड्ड्यांवरून काल्पनिक संवाद दाखवण्यात आला आहे. या बॅनरवर गणपती बाप्पा आणि गणपती बाप्पाचे वाहन मूषक यासह शहरातील काही खड्ड्यांचे छायाचित्र देखील टाकण्यात आले आहेत. या बॅनरच्या माध्यमातून प्रशासनाचे लक्ष वेधून घेण्याचा प्रयत्न केला जातोय.एकीकडे नाशिककर नागरिक शहरातील रस्त्यांवर पडलेल्या खड्ड्यांमुळे आणि रोजच्या वाहतूक कोंडीमुळे हैराण झालेले असताना खड्डे आणि ट्राफिकला उद्देशून गणेशोत्सवाच्या काळात नाशिकमध्ये केलेली ही बॅनरबाजी चांगलाच चर्चेचा विषय ठरत आहे. पावसाळा आणि रस्त्यावरील खड्डे हे समीकरण नाशिककरांसाठी नवीन नाही मात्र यंदाच्या गणेशोत्सवात तरी गणरायाचे आगमन खड्डे मुक्त रस्त्यावरून होईल, अशी आशा सर्व गणेश भक्तांना होती. यातच आता हे बॅनर लावण्यात आले आहेत.नाशिक शहरातील सर्वच परिसरात खड्ड्यांचे साम्राज्य निर्माण झाले आहे. नागरिकांना रोजच या खड्ड्यातून जीवघेणा प्रवास करावा लागत आहे. खड्ड्यांमुळे अनेक अपघाताच्या घटना देखील घडत आहेत अनेक लहान-मोठे अपघात घडत आहेत अनेकांना इजा होत आहे अनेकांच्या वाहनांचे नुकसान होत आहे. अनेकवेळा खड्ड्यांच्या विरोधात आंदोलन झाले, निवेदनं देण्यात आली. नागरिकांकडून रोजच महापालिकेच्या कारभाराविरोधात संताप व्यक्त केला जात आहे. तरी देखील पालिका प्रशासन नाशिक शहरातील खड्ड्यांच्या बाबतीत गांभीर्याने लक्ष देत नसल्याचे दिसत आहे. त्यामुळे तरी गणपती बाप्पा यंदा खड्डे बुडवण्यासाठी प्रशासनाला सदबुद्धी देईल का? असा प्रश्नच सर्व नाशिककरांना पडला आहे.बॅनर वरील लक्षवेधी आशय
बॅनरवरील आशय आपण पाहिला तर गणपती बाप्पा आपल्या वाहन असलेल्या मूषकला विचारत आहे. नाशिककरांची गणेशोत्सव व माझ्या स्वागताची तयारी झाली का? केव्हा प्रस्थान करायचे? तर यावर गणपती बाप्पाचे वाहन असलेले मूषक उत्तर देतात बाप्पा.. नाशिक शहरातील ट्रॅफिकची व रस्त्यावरील खड्यांची एकंदरित परिस्थिती बघता आपल्याला थोडं लवकरच? निघावे लागेल. अशा पद्धतीचा काल्पनिक संवाद या बॅनरच्या माध्यमातून प्रशासनाचे लक्ष वेधून घेण्याचा प्रयत्न करत आहे.
