मुंबईच्या पश्चिम उपनगरात असलेल्या अंधेरीत राहणाऱ्या सुजित दुबेचा एक व्हिडीओ सोशल मीडियावर व्हायरल झाला आहे. राज ठाकरे से हमारी दुश्मनी है, असं म्हणत सुजीतनं मनसे प्रमुखांना दारुच्या नशेत शिवीगाळ केली. त्याचा व्हिडीओ व्हायरल होताच मनसेचे कार्यकर्ते आक्रमक झाले. महाकाली रोडवरील सुंदर नगर परिसरात सुजीत दुबे एक वॉशिंग सेंटर चालवतो. हे सेंटर अनधिकृत आहे. त्याचा तोडफोड मनसेच्या माथाडी कामगार विभागाच्या कार्यकर्त्यांनी केली.

मनसैनिकांनी वॉशिंग सेंटरचे बांबू काढले. ताडपात्रही काढून टाकण्यात आली. यावेळी कार्यकर्त्यांनी जोरदार घोषणाबाजी केली. ‘सुजीत दुबेला आम्ही शोधत आहोत. पण तो अद्याप तरी सापडलेला नाही. तो जेव्हा आमच्या हाती लागेल, तेव्हा त्याला तिथल्या तिथे चोप देऊ. दुबे आणि त्याचा मित्र दोघेही गायब आहेत. पण मनसैनिक त्यांना शोधून काढतील आणि धडा शिकवतील,’ असा इशारा मनसेच्या कार्यकर्त्यानं दिला.

‘सुजीत दुबेचं वॉशिंग सेंटर अनधिकृत आहे. पण ते अधिकृत असतं तरीही आम्ही ते फोडलं असतं. सुजीत दुबे याच सेंटरवरुन परिसरात अंमली पदार्थांचा पुरवठा करतो, अशीही माहिती आम्हाला मिळाली आहे. पोलिसांनी दुबेच्या वडिलांना ताब्यात घेतलं आहे. पण दुबे आणि त्याचा मित्र फरार आहे. आम्ही त्यांचा शोध घेत आहोत. जेव्हा भेटेल, तेव्हा त्याला तिथेच मनसेचा हिसका दाखवू,’ अशी थेट धमकी मनसेच्या कार्यकर्त्यानं दिली आहे.

‘महाराष्ट्रात राहून हा दुबे आम्हाला शिकवणार का? राज साहेबांना आव्हान देणार का? त्याला आम्ही सोडणार नाही आणि हा आमचा शब्द आहे. जिथे सापडेल, तिथे त्याला चोप देऊ. मराठी माणूस संतापला की काय करतो हे त्याला दाखवून देऊ,’ अशी संतप्त प्रतिक्रिया तोडफोडीत सहभागी असलेल्या कार्यकर्त्यानं दिली.