राधेसिंह ठाकूर हे हॉटेल व्यावसायिक होते. शहरातील हिंगोली नाका परिसरात त्यांचं हॉटेल आहे. हॉटेल चालवून ते आपल्या कुटुंबीयांचा उदरनिर्वाह करायचे. मागील काही दिवसांपासून त्यांची तब्बेत ठीक नव्हती. सतत दवाखाना त्यांच्या मागे लागला होता. कुटुंबीय त्यांच्या तब्बेतीची काळजी घेत होते. मात्र तब्बेत जास्त खालावत असल्याने त्यांना अधिकच त्रास होत होता. मागील काही दिवसांपासून ते हॉटेलला जात नव्हते. घरीच राहत होते. मात्र काल शुक्रवारी रात्रीपासून ते अचानक कोणालाही न सांगता घरून निघून गेले होते. राधेसिंह घरातून गेले पण परत बराच वेळ होऊनही आले नाहीत. ते घरात न आल्याने कुटुंबीयांनी सर्वत्र त्यांचा शोध घेण्याचा प्रयत्न केला. नातेवाईक, मित्रमंडळी सर्वांना विचारपूस केली परंतु त्यांचा शोध लागला नव्हता.
वडिलांचा इशारा, आईने हातात चाकू दिला; चार मुलांचा शेजारी कुटुंबावर हल्ला, जमिनीच्या वादातून संभाजीनगरमध्ये खळबळ
आज शनिवारी सकाळी पद्मतीर्थ तलावात एक मृतदेह तरंगत असल्याचं तिथे पोहणाऱ्या काही लोकांना दिसलं. नागरिकांनी तात्काळ घटनेची माहिती वाशिम शहर पोलिसांना दिली. घटनेची माहिती मिळताच शहर पोलिसांनी घटनास्थळी धाव घेत मृतदेह पाण्यातून बाहेर काढत व्यक्तीचे खिसे तपासले. त्यावेळी मृत राधेसिंह यांच्या खिशात एक सुसाइड नोट आढळून आली. त्या नोटमध्ये माझी तब्बेत ठीक नसल्याने मी जीवन संपवत आहे. यात कोणीही दोषी नाही. माझ्या कुटुंबीयांना त्रास देऊ नका, राधेसिंह ठाकूर, असं लिहिलं होतं, अशी माहिती घटनास्थळी दाखल पोलीस सूत्रांकडून सांगण्यात आलं आहे.

सुसाइड नोटमध्ये राधेसिंह नाव लिहिलेलं असल्याने तो मृतदेह राधेसिंह ठाकूर यांचा असल्याचं पोलिसांच्या प्रथमदर्शनी लक्षात आलं. यावरून पोलिसांनी कुटुंबीयांशी संपर्क करून ओळख पटवून घेत मृतदेह ताब्यात घेतला आणि शवविच्छेदन करण्यासाठी जिल्हा सामान्य रुग्णालयात नेला असून पुढील तपास वाशिम शहर पोलिस करत आहेत.