भारतीय हवामान विभागाकडून याबाबत महत्त्वाची माहिती देण्यात आली आहे. मुंबई, ठाणे, रायगड, पालघर, रत्नागिरी या जिल्ह्यांना पुन्हा एकदा हवामान विभागाकडून तीन तासांसाठी रेड अलर्ट देण्यात आला आहे. या काळात जोरदार ते अतिजोरदार पावसाच्या सरी आणि त्यासोबत 40 ते 50 किलोमीटर प्रति तास किंवा 60 किलोमीटर प्रति तास वेग घेणारे वारे वाहण्याची शक्यता आहे.

मध्य रेल्वे कोलमडली

मुसळधार पावसाचा सर्वात मोठा फटका हा मध्य रेल्वेला बसलं आहे. मध्य रेल्वे सहा ते सात तासांपासून ठप्प झाली आहे. ठाणे, दादर, कुर्ला, छत्रपती शिवाजी महाराज टर्मिनस, कल्याण या स्थानकांवर प्रवाशांची प्रचंड गर्दी जमली आहे. जो तो आपापल्या घरी जाण्यासाठी व्याकूळ झाला आहे. पण लोकल ट्रेन बंद असल्याने प्रवाशांची मोठी गैरसोय होत आहे. ठाणे स्थानकांवरील प्रवाशांनी तर एका वृत्त वाहिनीला प्रतिक्रिया देताना टॉयलेटची देखील सोय नसल्याची तक्रार केली आहे. त्यामुळे प्रवासी किती त्रासातून जात आहेत हे स्पष्ट होत आहे. फक्त मध्य रेल्वेच नाही तर हार्बर रेल्वे सेवा देखील ठप्प झाली आहे. पश्चिम रेल्वे सेवेलादेखील त्याचा फटका बसला आहे.

मुंबई पाठोपाठ ठाणे, रायगड आणि पालघरमध्ये धुवाँधार

फक्त मुंबईच नाही, तर ठाणे, नवी मुंबई, रायगड, पालघर जिल्ह्यांना पावसाने अक्षरश: झोडपून काढलं आहे. ठाण्यातील अनेक रस्ते पूर्णपणे पाण्याखाली गेले आहेत. ठाणे जिल्ह्यातील कल्याण डोंबिवली शहरात पावसाने प्रचंड धुमाकूळ घातला आहे. परिणामी वालधूनी नदीचे पाणी हे कल्याणमध्ये शहरात शिरले आहेत. नदीकाठच्या घरांमध्ये कंबरेइतकं पाणी भरलं आहे. तसेच कुर्लाच्या एलबीएस रोडवरदेखील कंबरेइतके पाणी भरलं आहे. रायगड जिल्ह्यालाही प्रचंड पाऊस पडतोय. तसेच पालघर जिल्ह्यात प्रचंड पाऊस पडतोय. वसई, विरार शहराला पावसाचा मोठा फटका बसलेला बघायला मिळतोय. तसेच पालघरमध्ये भातशेती पाण्याखाली गेली आहे.