काँग्रेस नेते राहुल गांधी यांनी मत चोरीचा आरोप करताना काही आकडे दाखवले. महाराष्ट्रात मतांची चोरी झाली असा आरोप करताना काँग्रेसकडून संजय कुमार यांनी दिलेल्या आकडेवारीचा दाखला दिला जात होता. संजय कुमार यांच्या एक्स पोस्टचा संदर्भ काँग्रेसकडून देण्यात येत होता. पण आता संजय कुमार यांनी याबद्दल माफी मागितली आहे. त्यांनी एक पोस्ट सविस्तर पोस्ट लिहिली आहे. यानंतर सत्ताधारी भाजपनं काँग्रेसवर हल्ला चढवला आहे.

‘महाराष्ट्राच्या निवडणुकीशी संबंधित पोस्ट केलेल्या ट्विटसाठी मी प्रामाणिकपणे माफी मागतो. २०२४ मध्ये झालेल्या लोकसभा आणि विधानसभा निवडणुकीच्या आकड्यांची तुलना करताना माझ्याकडून चूक झाली. आमच्या डेटा टीमकडून चूक घडली. ट्विट नंतर हटवण्यात आलं आहे. कोणत्याही प्रकारची चुकीची माहिती पसरवण्याचा माझा हेतू नव्हता,’ असं संजय कुमार यांनी ट्विटमध्ये म्हटलं आहे.

या घटनेनंतर मतदारांच्या कथित हेराफेरीवरुन सुरु असलेला आणखी वाढला आहे. निवडणूक आयोग आणि भाजपनं संगनमत केल्याचा आरोप कांग्रेसनं केला होता. यानंतर निवडणूक आयोगानं पत्रकार परिषद घेत स्पष्टीकरण दिलं. आता भाजपनं संजय कुमार यांच्यावर टिकेची झोड उठवली आहे. भाजपनं संजय कुमार यांना बेजबाबदार म्हटलं आहे. विरोधकांनी केलेल्या आरोपांना संजय कुमारांनी प्रोत्साहन दिल्याची टीका भाजपनं केली आहे.

संजय कुमार यांनी एक्स पोस्ट करत माफी मागितल्यावर भाजप नेते अमित मालवीय यांनी त्यांचा समाचार घेतला. ‘ही कोणतीही प्रामाणिक चूक नव्हती. महाराष्ट्रात काँग्रेसनं केलेल्या खोट्या दाव्यांना प्रोत्साहन देण्यासाठी अतिउत्साहात सीएडीएसनं कोणतीही खातरजमा न करता आकडे प्रसिद्ध केले. हे विश्लेषण नाही, पूर्वग्रहातून हा प्रकार झालेला आहे,’ अशा शब्दांत मालवीय यांनी संजय कुमार यांच्यावर टीका केली आहे.