मुंबई शहर आणि उपनगरात दहीहंडी उत्सव मोठ्या प्रमाणात साजरा केला जातो. त्यातच राजकीय पक्षांमध्ये पडलेले गटतट, काही दिवसांवर येऊन ठेपलेल्या महापालिका निवडणुका यामुळे दहीहंडी आयोजनाचे प्रमाण यावर्षी वाढले आहे. त्यामुळे मुंबई पोलिसही सतर्क झाले असून आयोजन स्थळी चोख पोलिस बंदोबस्त ठेवण्यात येणार आहे. कायदा आणि सुव्यवस्था बिघडणार नाही यासाठी सर्वोतपरी खबरदारी घेतली जात असतानाच महिलांच्या सुरक्षेवर विशेष नजर असेल. त्यादृष्टीने आयोजक, मंडळे आणि गोविंदा पथकांना मार्गदर्शक सूचना देण्यात आल्या असल्याचे पोलिसांनी म्हटले आहे. कुणाच्या भावना दुखावतील अशा प्रतिमा, चिन्हे, फलक यांचे प्रदर्शन करू नये असेही पोलिसांनी बजावले आहे.
Thane Dahi Handi 2025: हंडीत कोट्यवधींचे ‘लोणी’; ठाण्यात आज रंगणार दहीहंडी उत्सवाचा थरार
जखमी गोविंदांसाठी रुग्णालये सज्ज
जेजे रुग्णालयामध्ये गोविंदावर उपचारासाठी स्वतंत्र कक्षाची उपलब्धता ठेवण्यात आली आहे त्यात तीस खाटा राखीव असून अस्थिव्यंग विभागामध्येही काही खाटा राखीव ठेवण्यता आल्या आहेत. तसेच अपघात विभागामध्येही सर्व वैद्यकीय सुविधा आणि औषधांची उपलब्धता ठेवण्यात आल्याची माहिती जेजे रुग्णालयाचे अधिष्ठाता डॉ. अजय भंडारवार यांनी दिली.केईएम रुग्णालयामध्येही १५ खाटा जखमी गोविंदांसाठी राखीव ठेवण्यात आल्या आहेत. जी. टी. रुग्णालयातही विशेष वैद्यकीय कक्ष तयार करण्यात आला असल्याचे अधिष्ठाता डॉ. जितेद्र सकपाळ यांनी सांगितले.
ED Raid: ऑनलाइन सट्टयावर बडगा! 110 कोटींच्या रकमेवर ईडीची टाच, देशभरात १७ ठिकाणी छापे
महामुंबईत चैतन्यपूर्ण वातावरण
महापालिका निवडणुकीच्या पार्श्वभूमीवर यंदा सणांसाठी अधिक चैतन्यपूर्ण वातावरण निर्माण झाले आहे. गोविंदा पथकांची वाढलेली संख्या आणि आयोजकांचीही वाढलेली संख्या यामुळे मुंबई शहरापासून उपनगरे, वसई, विरार, ठाणे शहर येथे प्रत्यक्ष दहीहंडीमध्ये सहभागी होणाऱ्यांसोबतच हा थरार पाहण्यासाठी येणाऱ्यांची संख्याही अधिक असेल असा अंदाज आहे. यंदा महिला गोविंदा पथक मध्येही चुरस अधिक असून पार्ले स्पोर्ट क्लबच्या महिला गोविंदांनी सात थरांसाठी सराव केला आहे. गोरेगावचे स्वस्तिक महिला गोविंदा पथक सहा थर लावणार असल्याचे पथकप्रमुख आरती बारी यांनी सांगितले. दहिसरमधील बालगोविंदाच्या मृत्यूनंतर अनेक आयोजकांनी हार्नेसबद्दल चौकशी केल्याचे साहसी खेळांसाठी सुविधा पुरवणारे रत्नाकर पिंपळेश्वर यांनी सांगितले. पिंपळेश्वर यांच्याकडून आठ आयोजकांनी सुरक्षेसाठी हार्नेसची तरतूद केली आहे.