बंडू येवले, लोणावळा : स्वातंत्र्य दिनाच्या पूर्व संध्येला आलेली पतेती व स्वातंत्र्य दिनानंतर शनिवार व रविवारच्या सलग सुट्ट्यांचा लाँग वीकेण्डमुळे वर्षाविहार व पावसाळी पर्यटनासाठी मोठ्या संख्येने पर्यटक लोणावळा, खंडाळा, मावळासह पाचगणी, महाबळेश्वर, कोल्हापूर व गोवा व इतर ठिकाणच्या हवेच्या, समुद्र किनारा व धार्मिक पर्यटनस्थळांवर दाखल झाले होते. पर्यटकांच्या गर्दीने मावळातील पर्यटनस्थळे गजबजली असून, पर्यटकांचे आकर्षणाचे केंद्र असलेल्या भुशी धरणावर पर्यटकांच्या संख्येसह त्यांच्या आनंदाला उधाण आले होते. वाढत्या वाहनांच्या संख्येमुळे जलदगती संबोधला जाणाऱ्या मुंबई पुणे एक्सप्रेस वेवर आणि जुन्या मुंबई पुणे राष्ट्रीय मार्गावर शुक्रवारी पहाटेपासूनच प्रचंड वाहतूक कोंडी होऊन वाहनांच्या १० ते १२ किलोमीटर लांब रांगा लागल्याचं पाहायला मिळालं.

गेल्या काही वर्षांपासून लोणावळा, खंडाळा आणि मावळातील पर्यटन स्थळांवर स्वातंत्र्य दिनी पर्यटन आणि वर्षाविहाराचा आनंद लुटण्यासाठीची नवी क्रेज पर्यटकांमध्ये निर्माण झाली आहे. दिवसेंदिवस पर्यटनाचे आकर्षण वाढले आहे. मुंबई, ठाणे व पुण्यातील पर्यटकांसह महाराष्ट्र आणि देश विदेशातील पर्यटक लोणावळा, खंडाळा आणि मावळातील विविध पर्यटन व धार्मिक स्थळांना भेटी देतात. मात्र यावर्षी स्वातंत्र्य दिनाच्या पूर्वसंध्येला व त्यानंतर सलग सुट्ट्यांचा योग जुळून आल्याने शासकीय कर्मचाऱ्यांसह अनेकांनी कुटुंब व मित्रांसमवेत पावसाळी पर्यटनस्थळांना पसंती देत, लोणावळा, खंडाळा, मावळ, मुरुड, अलिबाग, कोल्हापूर, महाबळेश्वर, पाचगणी, कोकणसह राज्यातील विविध प्रसिद्ध पर्यटन स्थळांकडे मोर्चा वळवला.

महाराष्ट्रात शेतकरी कर्जमाफी होणार, पण सरसकट नाही, चंद्रशेखर बावनकुळे यांचं मोठं वक्तव्य

पर्यटकांचे आकर्षण असलेल्या लोणावळ्यातील भुशी डॅमच्या सांडव्यावरून वाहणाऱ्या पाण्यात भिजण्यासाठी पर्यटकांनी मोठ्या प्रमाणात गर्दी केली होती. भुशीडॅमसह लोणावळ्यातील टायगर, लायन्स, शिवलिंग व राजमाची पॉईंट्ससह गिधाड तलाव, घुबड धबधबा, तसेच कार्ला, भाजे, बेडसे लेणी, व पवनाधरण, तुंगार्ली, लोणावळा, वलवन, शिरोता आणि उकसान या धरण परिसरासह लोहगड, विसापूर, कोराईगड, राजमाची, तुंग, तिकोना या गड किल्ल्यांसह आंदर व नाणे मावळातील पर्यटनस्थळे पर्यटकांच्या गर्दीने गजबजलेली होती.

आधी आभाराचे बॅनर, मग पाया पडून नमस्कार, अजित पवार अन् संदीप क्षीरसागर यांच्यात जवळीक वाढली?

पावसाचा जोर मागील काही दिवसांपासून कमी झाल्याने लोणावळ्यासह मावळातील धबधब्यांचे पाणी ओसरल्याने तर भुशी धरणाच्या सांडव्यावरून वाहणारे पाणी कमी वाहत असतानाही पर्यटकांनी या गोष्टींचा विचार न करता पर्यटनाचा आनंद लुटला. स्वातंत्र्यदिनाच्या दिवशी भुशी धरणाकडे पायी जाणाऱ्या पर्यटकांची संख्याही लक्षणीय होती. लोणावळा उपविभागीय पोलीस अधिकारी गजानन टोणपे, शहर पोलीस निरीक्षक राजेश रामाघरे, लोणावळा ग्रामीण पोलीस निरीक्षक दिनेश तायडे, खंडाळा महामार्गाचे सहायक पोलिस निरीक्षक सुनील अवसरमोल, बोरघाट दस्तुरी महामार्गाचे सहायक पोलिस निरीक्षक स्वप्नील पाटील यांच्या मार्गदर्शनाखाली लोणावळा शहर व ग्रामीण पोलिसांसह दोन्ही महामार्ग पोलिस वाहतूक कोंडी सोडवण्यासाठी तसेच पर्यटनस्थळांवर कायदा व सुव्यवस्था अबाधित राखण्याचे काम करत आहे.

मुंबई पुणे एक्सप्रेस वेवर मुंबईहून पुण्याकडे जाणाऱ्या मार्गिकेवर मोठ्या प्रमाणात वाहतूक कोंडी होऊ लागल्याने खंडाळा व बोरघाट दस्तुरी महामार्ग पोलिसांनी १० मिनिटांचा ब्लॉक घेत वाहतूक कोंडी सोडवण्यासाठी प्रयत्न करत आहे. मोठ्या संख्येने पर्यटक बाहेर पडल्याने त्यांच्या वाढत्या वाहनांच्या संख्येमुळे मुंबई पुणे एक्सप्रेस वेसह जुन्या मुंबई पुणे राष्ट्रीय महामार्गावर तसेच लोणावळ्यातील भुशी धरण व टायगर पॉईंट्सकडे जाणाऱ्या मार्गावर प्रचंड वाहतूक कोंडी झाल्याने वाहनांच्या लांबच लांब रांगा लागल्या होत्या. या वाहतूक कोंडीमुळे पर्यटकांना तासंतास ताटकळत वाहतूक कोंडीशी सामना करावा लागला. तर खंडाळा घाटात वाहतूक कोंडीत तासंतास अडकलेली अनेक वाहने गरम झाली तर काही वाहने तांत्रिक बिघाडामुळे मार्गावर अडकली होती तर काही वाहने मार्गालगत उभी करण्यात आली होती. मार्गावर अडकलेल्या वाहनांना टोईंग वाहनांच्या सहाय्याने बाजूला करून मार्गालगत उभी करण्यात आली. अजून दोन दिवस सलग सुट्ट्या असल्याने वाहतूक कोंडीची समस्या अधिक गंभीर होण्याची शक्यता आहे. शुक्रवारी पहाटेपासूनच महामार्ग पोलिस व संबंधित स्थानिक पोलीस ठाण्यांचे वाहतूक पोलीस व यंत्रणा वाहतूक कोंडी सोडविण्यासाठी प्रयत्नांची पराकाष्ठा करत असून पोलिसांची दमछाक होत आहे.