नंदुरबार शहरातील सिद्धिविनायक चौकात राहणाऱ्या मोहित मदन राजपूत आणि सुनिल ज्ञानेश्वर राठोड यांच्यात आठ दिवसापूर्वी बॅनर लावण्यावरुन वाद झाला होता. या वादातून शहरातील सिद्धिविनायक चौकात मोहित राजपूत याला लाथा बुक्क्यांनी जीवे मारण्याच्या उद्देशाने लाथाबुक्क्यांनी मारहाण करण्यात आली होती. या मारहाणीत मोहित राजपूत याला गंभीर दुखापत झाली. त्याला तात्काळ उपचारासाठी सुरत येथील रुग्णालयात नेण्यात आले होते. रुग्णालयात उपचार सुरु असताना 11 ऑगस्ट रोजी सायंकाळी मोहित राजपूत याची प्रकृत्ती खालावल्याने त्याची प्राणज्योत मालवली.
Kolhapur News : “मी सुखरूप पोहोचले…”, वडिलांना शेवटचा फोन, कोल्हापुरात विद्यार्थिनीचं टोकाचं पाऊल, गर्ल्स हॉस्टेलमध्ये खळबळ
नंदुरबार शहरात मोहित राजपूत यांच्या मृत्यूची वार्ता पसरल्यानंतर सिद्धिविनायक चौकात मित्रपरिवारने एकच गर्दी केली. त्यानंतर तो जमाव थेट नंदुरबार शहर पोलीस ठाण्यासमोर जमा झाला. मोहित राजपूत याला मारहाण प्रकरणी संशयीतांवर कारवाई करण्याची मागणी करण्यात आली. याप्रकरणी जयेश कन्हैय्यालाल राजपूत रा. नवनाथनगर, नंदुरबार यांच्या फिर्यादीवरून नंदुरबार शहर पोलीस ठाण्यात सुनिल ज्ञानेश्वर राठोड, मुकेश उर्फ राणा राजपूत, संजय राजपूत उर्फ पप्पु तलवार, यशवर्धन लुळे उर्फ मुत्रा मराठे, अनिकेत तवर सर्व रा. नंदुरबार यांच्याविरुद्ध भारतीय न्यायसंहिता कलम १०३, (१), ३ (५) प्रमाणे गुन्हा दाखल करण्यात आला आहे.

या प्रकरणी पुढील तपास पीएसआय स्वप्निल पाटील करत आहेत. मोहित राजपूत याचा मोठा मित्रपरिवार नंदुरबार शहरात आहे. मनमिळावू स्वभाव असलेल्या मोहित याच्या मृत्यूच्या घटनेमुळे सर्वत्र हळहळ व्यक्त करण्यात येत आहे.