विवाहितेने औषध घेतल्याचं समजताच तिला उपचारासाठी रुग्णालयात नेण्यात आले. पण, तिथे उपचारादरम्यान तिचा मृत्यू झाला. ही घटना परभणीच्या जिंतूर तालुक्यातील सावंगी भांबळे येथे घडल्याची माहिती आहे. मृत नवविवाहितेचे नाव तन्वी शुभम भाबळे (वय 18 वर्ष) असं आहे.

याविषयी विस्तृत माहिती अशी की, 22 एप्रिल 2025 रोजी तन्वीचा विवाह शुभम भांबळे या युवकासोबत झाला होता. लग्नानंतर तन्वी शुभमच्या सांगवी भांबळे येथील घरी नांदण्यासाठी गेली. सुरुवातीचे काही दिवस सासरच्यांनी चांगले नांदवले, मात्र नंतर तिला त्रास देण्यास सुरुवात केली. तुला घरातील काम व्यवस्थित करता येत नाही. शेतात कामाला जात नाहीस, असे म्हणून तन्वीला शिवीगाळ सुरू केली.
Crime Diary: रस्त्याच्या कडेला सात प्लास्टिकच्या पिशव्या, उघडताच साऱ्यांना धक्का, एकात शीर अन् महिलेच्या बॉडीचे तुकडे
या दरम्यान तन्वीने आपल्या माहेरच्यांना हा सर्व प्रकार देखील फोनवर सांगितला होता. तरी देखील तन्वीचा छळ मात्र सुरूच होता. नवऱ्यासोबत सासू-सासरे देखील त्रास देत असल्याने तन्वी प्रचंड खचली होती.

3 ऑगस्ट रोजी तन्वीने सासरचा त्रास असह्य झाल्याने घरात असलेले उंदीर मारण्याचे औषध घेतले. औषध प्यायल्याची बातमी घरी कळतात तन्वीला परभणी येथील रुग्णालयात दाखल करण्यात आले. पण, डॉक्टरांच्या सल्ल्यानुसार छत्रपती संभाजीनगर येथे पुढील उपचारासाठी तन्वीला नेण्यात आले. छत्रपती संभाजीनगर येथे उपचारादरम्यान तन्वीचा मृत्यू झाला.

त्यानंतर विशाल राजेभाऊ एक्कर यांनी परभणीच्या बामणी पोलिस ठाण्यात त्यांची चुलत बहीण तन्वी भांबळे हिला नवरा शुभम रंजीत भांबळे, सासरा रंजीत लिंबाजी भांबळे, सासू कालींदा रंजीत भांबळे यांनी त्रास दिल्यामुळे कंटाळून बहीण तन्वीने विषारी औषध पिऊन जीव दिल्याप्रकरणी गुन्हा दाखल केला आहे.

एकंदरीतच लग्नाला चार ते पाच महिनेच पूर्ण झाले असताना नवविवाहितेला आत्महत्या करावी लागली यामुळे परभणी जिल्हाभरामध्ये हळहळ व्यक्त केली जात आहे. एकीकडे सरकार लाडक्या बहिणींना वेगवेगळ्या सुविधा देत असले तरी आजही समाजामध्ये विवाहित महिलांना सासरच्या मंडळीकडून प्रचंड त्रास होताना दिसून येत आहे. समाजाची कितीही प्रगती झाली तरी मात्र ही मानसिकता अद्यापही कमी होते असताना दिसून येत नाही.