नेमकं प्रकरण काय?

अहिल्यानगरच्या अकोले तालुक्यातील मारुती मेंगाळ हे आदिवासी ठाकर समाजाचे मोठे नेते म्हणून ओळखले जातात. मेंगाळ यांनी तीन महिन्यांपूर्वी आपल्या समर्थकांसह शक्ती प्रदर्शन करत ठाणे येथे एकनाथ शिंदे यांच्या शिवसेनेत प्रवेश केला होता. आपल्यासोबत अकोले तालुक्यातील अनेक ग्रामपंचायतचे सरपंच आणि सदस्य, पंचायत समिती सदस्य, नगरसेवक, विविध पक्ष संघटनांचे पदाधिकारी आणि कार्यकर्ते असल्याचा दावा मारुती मेंगाळ यांनी केला होता. याचदरम्यान, मेंगाळ यांच्यासमवेत पक्षप्रवेश केलेल्या लोकांची यादी समोर आली असून यातील अनेक नावे बोगस असल्याचा आरोप केला आता त्यांच्यावर केला जातोय. यादीत नाव असणाऱ्या अनेकांनी आपले व्हिडिओ प्रसारित करत आपण असा पक्षप्रवेश केलाच नसल्याचा दावा केलाय.
Raigad News : महाराष्ट्राच्या राजकारणातील मोठी बातमी, रायगड जिल्ह्यात होणार राजकीय भूकंप?, शिंदेंच्या नेत्याने फिरवली सूत्र
या सगळ्या प्रकारानंतर शिवसेना शिंदे गटाचे शिर्डी लोकसभा संपर्कप्रमुख बाजीराव दराडे यांनी प्रतिक्रिया दिली आहे. ते म्हणाले की, ‘मारुती मेंगाळ यांच्या पक्ष प्रवेशावेळी पक्षाने आम्हाला कल्पना दिली नाही. काही दिवसांपूर्वी पक्ष प्रवेशाची यादी समोर आल्यानंतर अनेकांनी हरकती घेतल्या आहेत. शहानिशा केल्यानंतर यादीतील ४० ते ५० लोकांची नावे बोगस असल्याचं समोर आलंय. पक्षाची आणि वरिष्ठ नेत्यांची दिशाभूल करण्यात आल्याचं आम्ही नेत्यांना कळवलंय. या प्रकारामुळे पक्षाची प्रतिमा मलिन होत असून वरिष्ठांनी योग्य तो निर्णय घ्यावा’, असं दराडे म्हणाले आहेत.

दरम्यान, ९ ऑगस्ट रोजी आदिवासी दिनाचे औचित्य साधून मारुती मेंगाळ यांनी अकोले येथे भव्य कार्यक्रमाचं आयोजन केलं आहे. उपमुख्यमंत्री एकनाथ शिंदे यांना कार्यक्रमाचं निमंत्रण देण्यात आलं आहे. मात्र, शिंदे यांच्या संभाव्य दौऱ्यापूर्वीच मेंगाळ यांच्यावर पक्षप्रवेश घोटाळा आणि पक्षाची दिशाभूल केल्याचा आरोप होतोय. या सगळ्या प्रकारानंतर एकनाथ शिंदे आणि वरिष्ठ नेते या सर्व प्रकणावर काय भूमिका घेतात याकडे सर्वांचं लक्ष लागलं आहे.