परभणीतील राष्ट्रवादी काँग्रेस शरद पवार पक्षाचे माजी आमदार विजय भांबळे यांनी काही दिवसांपूर्वीच अजित पवारांच्या राष्ट्रवादी प्रवेश केला. यानंतर आता धाराशिवच्या भूम-परांडा मतदारसंघाचे माजी आमदार राहुल मोटे यांनी अजित पवारांना साद घातली आहे. त्यांचा पक्ष प्रवेश लवकरच होणार आहे. मोटे यांच्या पक्ष प्रवेशानं भूम-परांडा मतदारसंघातील राजकीय समीकरणं बदलणार आहेत.

२०१९ ते २०२४ या कालावधीत मंत्री राहिलेल्या शिवसेनेच्या तानाजी सावंत यांच्या विरोधात अजित पवारांची राष्ट्रवादी काँग्रेस तगडी फिल्डींग लावताना दिसत आहे. २०१९ आणि २०२४ मध्ये तानाजी सावंत यांनी राहुल मोटे यांचा पराभव केला. २०१९ मध्ये मोटे एकसंध असलेल्या राष्ट्रवादी काँग्रेसकडून लढले. पक्षात फूट पडल्यानंतर ते शरद पवारांसोबत राहिले. पक्षानं त्यांना २०२४ मध्ये विधानसभेचं तिकीट दिलं. पण अटीतटीच्या लढतीत त्यांना निसटता पराभव पत्करावा लागला.

२०१९ मध्ये परांड्यातून पहिल्यांदाच आमदार झालेल्या तानाजी सावंत यांनी उद्धव ठाकरेंनी मंत्रिपद दिलं. २०२२ मध्ये शिवसेनेत फूट पडल्यावर तानाजी सावंतांनी एकनाथ शिंदे यांची साथ दिली. शिंदे यांच्याकडे गेलेले सावंत पुन्हा मंत्री झाले. त्यांच्या अनेक संस्था आहेत. विविध क्षेत्रात त्यांच्या संस्था कार्यरत आहेत. मोटे यांनी राष्ट्रवादीत प्रवेश केल्यास स्थानिक पातळीवर अजित पवारांच्या पक्षाला मोठी ताकद मिळेल.

राहुल मोटे यांच्या वडिलांनी १९८५ ते १९९५ अशी १० वर्षे आमदारकी भूषवली. त्यानंतर राहुल मोटे २००४ ते २०१९ अशी सलग १५ वर्षे आमदार राहिले. सलग तीन निवडणुका त्यांनी जिंकल्या. २०१९ मध्ये तानाजी सावंत यांनी त्यांचा पराभव केला. २०२४ मध्येही सावंत यांनी विजय मिळवला. पण मोटे यांनी जबरदस्त लढत दिली. अवघ्या दीड हजार मतांनी ते पराभूत झाले. त्यांनी १ लाखांहून अधिक मतं घेतली. त्यामुळे मोटे यांचा पक्षप्रवेश भूम-परांड्यात राष्ट्रवादीची ताकद वाढवणारा ठरणार आहे.