याप्रकरणी आमदार रोहित पवार यांनी समाज माध्यमांवर तीव्र प्रतिक्रिया देत गृहमंत्री फडणवीस यांच्यावर निशाणा साधला होता. ‘शांताराम जाधव यांची गाडी कोणी जाळली याचे उत्तर गृहमंत्र्यांनी द्यावे,’ अशी मागणी त्यांनी केली. मुख्यमंत्र्यांनी या प्रकरणाची गंभीर दखल घ्यावी, असेही त्यांनी म्हटले आहे. आमदार रोहित पवारांनी अर्ध्या हळकुंडाने शहाणं होऊ नये, असा टोला आता माजी आमदार राजेंद्र राऊत यांनी लगावला आहे.

रोहित पवारांनी सोशल मीडियावर व्यक्त केली नाराजी

बार्शीत राष्ट्रवादीच्या नेत्यांची वाहने जाळली जात आहेत, अशी पोस्ट करत आमदार रोहित पवार यांनी समाज माध्यमांवर तीव्र प्रतिक्रिया दिली होती. ‘जाधव यांची गाडी कोणी जाळली याचे उत्तर गृहमंत्र्यांनी द्यावे,’ अशी मागणी रोहित पवारांनी केली होती. मुख्यमंत्र्यांनी या प्रकरणाची गंभीर दखल घ्यावी, असेही त्यांनी म्हटले होते. रोहित पवार यांनी माजी आमदार राजेंद्र राऊत यांच्या सुपुत्र रणवीर राऊत यांच्यावर थेट आरोप करत, ‘राजकीय सूडबुद्धीने ही घटना घडवण्यात आली,’ असा दावा करत एक व्हिडिओही पोस्ट केला होता.

जहागिरी गेली मात्र फुगीरी गेली नाही : रोहित पवार

एक महिना अगोदर माजी आमदार राजेंद्र राऊत यांचे पुत्र रणवीर राऊत यांनी शांताराम जाधव व त्यांच्या सहकाऱ्यांना शिवीगाळ करतानाचा व्हिडिओही समोर आला होता.यावरून राजकीय वाद शिगेला पोहोचल्याचे संकेत मिळत होते.रोहिती पवारांनी पोस्ट करताना “जहागिरी गेली मात्र फुगिरी गेली नाही,” असा टोला रोहित पवार यांनी माजी आमदार राजेंद्र राऊत यांना निवडणुकीतील पराभवाच्या पार्श्वभूमीवर लगावल्याने वाद अधिक चिघळण्याची शक्यता आहे.

रोहित पवारांनी अर्ध्या हळकुंडाने शहाणं होऊ नये

राजेंद्र राऊत यांनी माध्यमांसमोर प्रतिक्रिया देताना रोहित पवार हे त्यांच्या आजोबांच्या पावलावर पाऊल ठेवून राज्यात राजकारण असल्याचे भासवत आहेत. यांच्या आजोबांनी देशात आणि राज्यात राजकारण केलं आहे. त्यांचे आजोबा कशा पद्धतीने माहिती घेत होते, त्यांनी घरातून मार्गदर्शन घ्यावं. अर्ध्या हळकुंडाने रोहित पवारांनी शहाण होऊ नये, असा टोला माजी आमदार राजेंद्र राऊत यांनी लगावला आहे. रोहित पवारांनी चुकीच्या माहितीच्या आधारावर कोणावर असे बेछुट आरोप करू नये. रोहित पवार यांनी पोस्ट माध्यमातून केलेल्या आरोपांना माजी आमदार राजेंद्र राऊत यांनी जोरदार प्रत्युत्तर दिलं आहे.