एकीकडे कोट्यवधी रुपयांची टोल वसुली करायची आणि दुसरीकडे खड्ड्यांनी चाळण झालेल्या रस्त्यावरून नागरिकांना जीवघेणा प्रवास करायला लावायचा, या महामार्ग प्राधिकरणाच्या बेजबाबदार कारभाराचा उत्तम नमुना धुळे शहरालगतच्या मुंबई-आग्रा महामार्गावर पाहायला मिळत आहे. शहरातील चाळीसगाव चौफुली परिसरात महामार्गावर मोठमोठे खड्डे पडल्याने अक्षरशः रस्त्याची दुरवस्था झाली आहे. यामुळे दररोज लहान-मोठे अपघात घडत असून, वाहनधारकांना नाहक मनस्ताप सहन करावा लागत आहे. विशेष म्हणजे, याच रस्त्यावर जिल्हा रुग्णालय असल्याने रुग्णांनाही या खड्ड्यांच्या प्रवासातून वेदना सहन कराव्या लागत आहेत.
