Divya Deshmukh : बुद्धिबळ विश्वचषक स्पर्धेत विजेतेपद पटकावून ग्रँडमास्टर दिव्या देशमुख आज नागपुरात दाखल झाली. यावेळी नागपूर विमानतळावर तिचं जंगी स्वागत करण्यात आलं. दिव्याच्या स्वागतासाठी नागपूरकरांनी नागपूर विमानतळाबाहेर मोठी गर्दी केलेली होती. नागपूरकरांनी केलेलं स्वागत पाहून दिव्या देखील भारावली.
जॉर्जियात स्पर्धा खेळून मुंबई मार्गे रात्री उशिरा नागपुरात दाखल झालेल्या आपल्या या नव्या ‘वर्ल्ड चॅम्पियन’चे नागपूरकरांनी जंगी स्वागत केले. रात्री सव्वानऊच्या सुमारास दिव्याचे आगमन होणार होते. मात्र, तासभर आधीपासूनच विमानतळावर तिच्या स्वागताची जय्यत तयारी महाराष्ट्र बुद्धिबळ संघटना, नागपूर चेस असोसिएशन आणि इतर संघटनांनी करून ठेवली होती. आई डॉ. नम्रता देशमुख यांच्यासह दिव्या विमानतळाच्या बाहेर येताच उपस्थित सर्वांनी एकच जल्लोष केला.
बाहेर पडताच दिव्याने सर्वप्रथम वडील डॉ. जितेंद्र देशमुख यांना कडकडून मिठी मारली. तर आजीच्या पाया पडत आशीर्वाद घेतला. वर्ल्ड चॅम्पियन दिव्याला बघताच कुटुंबातील सर्व सदस्य भावूक झाले होते. तिच्या स्वागतासाठी लहान मुलांसह त्यांचे पालक, बुद्धिबळप्रेमी यांनी हातात बॅनर, दिव्याचे अभिनंदन करणारे फलक घेऊन तिचे स्वागत केले. ढोलताशे व घोषणांनी विमानतळ परिसर दणाणून गेला होता. लॉबी मध्ये येताच दिव्याला ‘टिआरा’ घालण्यात आला.
विमानतळावर झालेली गर्दी बघता पोलिसांना दिव्याला तिच्या मिरवणूकीसाठी ठेवण्यात आलेल्या जीपपर्यंत पोहचवण्यासाठी चांगलीच कसरत करावी लागली. यावेळी वडील डॉ. जितेंद्र यांच्यासह कुटुंबातील सदस्य उपस्थित होते. विमानतळावर महाराष्ट्र बुद्धिबळ संघटनेचे अध्यक्ष आमदार परिणय फुके, नागपूर चेस असोसिएशनचे अध्यक्ष गिरीश व्यास, ग्रँडमास्टर अभिजित कुंटे, जिल्हा क्रीडा अधिकारी पल्लवी धात्रक, भाजपचे शहराध्यक्ष दयाशंकर तिवारी, महापालिकेचे क्रीडा अधिकारी पीयूष आंबुलकर यांच्यासह इतर मान्यवर उपस्थित होते.
‘माझ्यासाठी भावूक क्षण’
“हे यश माझ्यासाठी पहिले पाऊल आहे. खेळातील उणिवा दूर करून आणखी चांगली कामगिरी करता येईल, यासाठी प्रयत्न करणार आहे. माझ्या शहरवासीयांनी केलेले उत्स्फूर्त स्वागत हा खूप भावनिक क्षण आहे. यामुळे पुढे आणखी चांगली कामगिरी करण्याची प्रेरणा मिळेल”, अशी प्रतिक्रिया दिव्याने व्यक्त केली.
लेखकाबद्दलचेतन पाटील“चेतन पाटील हे पत्रकार आहेत. त्यांना राजकीय, सामाजिक, शैक्षणिक, मनोरंजन आणि क्रीडा अशा विविध बीटच्या बातम्या केल्याचा अनुभव आहे. चेतन पाटील यांनी दैनिक लोकमत, न्यूज 24, जय महाराष्ट्र, आपलं महानगर, न्यूज 18 लोकमत, टीव्ही 9 मराठी अशा विविध वृत्त संस्थांमध्ये काम केल्याचा अनुभव आहे. चेतन हे जवळपास 8 वर्षांपेक्षा अधिकचा काळ माध्यम क्षेत्रात कार्यरत आहेत. त्यांनी कल्याणच्या नामांकित बिर्ला महाविद्यालयातून पत्रकारितेतील पदवी शिक्षण घेतलं आहे. त्यांना पदवीचं शिक्षण घेत असताना एका पॉलिटीकल पीआर कंपनीसोबत काम करण्याचा अनुभव आहे. सध्या ते महाराष्ट्र टाइम्स ऑनलाईन येथे कार्यरत आहेत.
चेतन पाटील यांनी केलेल्या बातमीमुळे एका निराधार वृद्ध महिलेला खूप मोठी मदत झाली. याशिवाय चेतन पाटील यांनी लिहिलेल्या अनेक बातम्यांचा पॉझिटिव्ह इम्पॅक्ट पडलेला बघायला मिळाला आहे.
चेतन पाटील महाविद्यालयात शिक्षण घेत असताना त्यांच्या ‘भगतसिंग’ कवितेची निवड अखिल भारतीय मराठी साहित्य संमेलनाच्या कवीकट्टा सदरात वाचनासाठी झाली होती. चेतन पाटील यांनी नाटकातही काम केलं आहे. त्यांनी राज्य नाट्य हौशी स्पर्धेत भाग घेतलाय. त्यांनी ‘जलरंग तापी’ नाट्य संस्थेसोबत काम करत असताना ‘नटसम्राट’ नाटकात बूटपॉलिश करणाऱ्या राजाची भूमिका साकारली होती. त्यांची ही भूमिका प्रचंड भाव खाऊन गेली होती. त्यांच्या अभिनयाने प्रभावित होऊन एका प्रेक्षकाने त्यांना खांद्यावर उचलून घेत नृत्य केलं होतं.
खूप छोट्या गोष्टींमधून आनंद शोधावा, असं त्यांचं मत आहे. त्यांना पत्रकारितेसह वाचन, लेखनाची आवड आहे. चेतन पाटील यांचं आतापर्यंतचं वैयक्तिक आयुष्य खूप संघर्षमय आणि खडतर असल्यामुळे ते फार संवेदनशील आहेत. त्यामुळे संवेदनशील बातम्या हाताळताना ते अशा बातम्यांना न्याय देण्याचा पूरेपूर प्रयत्न करतात.”… आणखी वाचा