मिळालेल्या माहितीनुसार, लोढा सोसायटीमध्ये किशोर भेगडे याचा मुलगा आणि काही मित्र हे क्लब हाऊसमध्ये खेळत होते. किरकोळ कारणावरून खेळणाऱ्या या मुलांमध्ये वाद झाला. याची माहिती मिळताच किशोर भेगडे हा क्लब हाऊसमध्ये आला आणि त्याने या वादाचा जाब विचारात अल्पवयीन मुलांना जबर मारहाण केली. यामध्ये एका पंधरा वर्षाच्या मुलाला किशोर भेगडे याने मारहाण करत त्याच्या पोटात बुक्की मारली. याचा व्हिडीओ समाज माध्यमावर व्हायरल होत आहे.

हा किशोर भेगडे मुलांना मारत असताना तिथे उपस्थित असणाऱ्या नागरिकांनी मुलांना वाचवण्याचा प्रयत्न केला. पण हा भेगडे कोणाचंच ऐकायला तयार नव्हता. त्यानंतर किशोर भेगडे याने मारहाण केलेल्या 15 वर्षीय मुलाच्या नातेवाईकांनी थेट शिरगाव पोलीस ठाणे गाठत या भेगडेविरोधात जीवे मारण्याच्या प्रयत्न केल्याचा गुन्हा दाखल केला आहे. या तक्रारीनंतर भेगडेला पोलिसांनी बेड्या ठोकल्या आहेत.

सराईत गुन्हेगार असणाऱ्या किशोर भेगडे याने अल्पवयीन मुलांना मारहाण केली आहे. याप्रकरणी मारकुट्या किशोर भेगडेवर गुन्हा दाखल pic.twitter.com/nFHWDSazLx

— Maharashtra Times (@mataonline) July 29, 2025

दरम्यान, हा किशोर भेगडे राजकीय कुटुंबातील सदस्य आहे. मावळ विधानसभा मतदारसंघात अपक्ष निवडणूक लढवणाऱ्या बापू भेगडे यांचा तो पुतण्या आहे. यापूर्वीही किशोर भेगडेवर एक खुनाचा गुन्हा दाखल आहे. त्यामुळे सराईत असणाऱ्या या गुंडाचा व्हिडिओ व्हायरल झाल्यानंतर एकच संताप व्यक्त केला जात असून त्याच्यावर कठोर कारवाई करण्याची मागणी होत आहे.