या कामासाठी १३ कोटी ८२ लाख रुपये खर्च अपेक्षित असून त्यासाठी कंत्राटदाराचीही निवड केली आहे. ही कामे करताना या पुलावरील दोन मार्गिकांचे काम टप्प्याटप्प्यात केले जाणार आहे. वाहनचालकांना दक्षिण मुंबईतील सीएसएमटी परिसर, भायखळा, लालबागनंतर परळ टीटी उड्डाणपुलामार्गे, दादर टीटी, माटुंगा, सायनपासून पुढे पूर्व उपनगरांत जाता येते. त्यादृष्टीने मुंबई शहर ते मुंबई पूर्व उपनगरांसाठी परळ टीटी उड्डाणपूल महत्त्वाचा मानला जातो.

पुणेकरांनो, रस्त्यांवरील खड्डे बुजवण्यासाठी घरबसल्या तक्रार नोंदवा! पालिकेचे ‘पीएमसी रोड मित्र’ अ‍ॅप
या उड्डाणपुलाला ३६ वर्षे पूर्ण झाली आहेत. २०२३मध्ये या उड्डाणपुलावर काही ठिकाणी डांबराचा स्तर खराब झाल्याने वाहनचालकांना अडथळा येत होता. त्यामुळे अपघाताचाही धोका संभवत असल्याने पुलाच्या दुरुस्तीचे काम करण्याचा निर्णय महापालिकेने घेतला होता. यामध्ये पुलावरील पुनर्पृष्ठीकरणाचे काम महापालिकेने ऑक्टोबर २०२३मध्ये हाती घेतले. तत्कालीन मुख्यमंत्री एकनाथ शिंदे यांनीही एका पाहणी दौरादरम्यान या पुलाला प्रत्यक्ष भेट दिली होती आणि तातडीने पुलाची दुरुस्ती करण्याचे निर्देश महापालिकेला दिले होते.

त्यानुसार तात्पुरती दुरुस्ती करून पुलावरील रस्त्याच्या दुतर्फा डांबराचा थर बदलण्याचे काम हाती घेण्यात आले. तर प्रसरण सांधे भरण्यात आले. परळ टीटी उड्डाणपुलाच्या बळकटीकरणाचे मुख्य कामही हाती घेण्यात येणार होते. शिवडी-न्हावाशेवा मुंबई ट्रान्स हार्बर रस्ता वाहनचालकांच्या सेवेत आल्यानंतरच परळ टीटी पुलाच्या संपूर्ण कामाला सुरुवात करण्यात येणार होती.

लोअर परळ उड्डाणपूल नोव्हेंबर २०२३मध्ये पूर्णपणे सेवेत आला आणि परळ उड्डाणपुलाच्या दुरुस्तीचे महत्त्वाचे काम हाती घेण्याचा निर्णय झाला. दुरुस्ती आवश्यक असल्याने या पुलाच्या कामाचे मोठ्या प्रमाणात दुरुस्ती कामे येत्या पावसाळ्यानंतर हाती घेण्यात येणार असल्याची माहिती सूत्रांनी दिली. महापालिकेने सप्टेंबर २०२४ला दुरुस्ती आणि बळकटीकरण कामासाठी निविदाही काढली. ही निविदा आता अंतिम करून आणि मुंबई महापालिका आयुक्त यांची मंजुरी घेऊन काम सुरू करण्यावर शिक्कामोर्तब करण्यात आले आहे.

या उड्डाणपुलामध्ये २२ प्रसरण सांधे आहेत. त्यांची संख्या १० पर्यंत आणण्यात येणार आहे. पुलाच्या पृष्ठभागवरील रस्त्याची वारंवार दुरुस्ती करावी लागत आहे. तसेच, जास्त प्रसरण सांधे वाहतुकीसाठी गैरसोयीचे आहेत. यावर उपाय म्हणून पुलावरील पृष्ठभागासह अन्य भागात काँक्रिटीकरणाचा थर दिला जाणार आहे.