Sinhgad Road Flyover: पुणे महापालिकेने सिंहगड रस्त्यावरील उड्डाणपुलाचे काम पूर्णत्वाकडे नेले असून ऑगस्टच्या मध्यात तो वाहतुकीसाठी खुला होणार आहे. फनटाइम थिएटर ते विठ्ठलवाडी दरम्यानचा प्रवास आता अधिक सुलभ होणार आहे. तसेच, कर्वेनगर ते सनसिटी पुलाच्या कामातील भूसंपादनातील अडथळे दूर झाल्याने लवकरच हा मार्ग वाहतुकीसाठी मोकळा होईल.
पुण्यातील नरवीर तानाजी मालुसरे रस्त्यावरील (सिंहगड रस्ता) सततची वाहतूक कोंडी कमी करून वाहतुकीला गती देण्यासाठी येथे दुहेरी उड्डाणपुलाची योजना करण्यात आली. यासाठी ११८ कोटी रुपयांच्या निविदेला मंजुरी देण्यात आली होती. २१ सप्टेंबर २०२१पासून या पुलाचे काम सुरू झाले. सुमारे अडीच किलोमीटर लांबीचा हा पूल शहरातील सर्वाधिक लांबीचा उड्डाणपूल आहे. इनामदार चौक ते फनटाइम ही बाजू मार्चअखेर आणि माणिकबाग ते विठ्ठलवाडी यादरम्यानची बाजू डिसेंबरअखेर वाहतुकीसाठी खुली करण्याचे नियोजन होते. मात्र, या पुलाचे काम नियोजित वेळेच्या सहा महिने आधी पूर्ण झाल्याने एक मे २०२५ रोजी पुलाची एक बाजू (इनामदार चौक ते फनटाइम) वाहतुकीसाठी खुली करण्यात आली.
या पुलाची ‘फनटाइम’कडून इनामदार चौकापर्यंतची बाजू (तिसरा टप्पा) जुलै महिन्यात खुली करण्याचे पालिकेचे नियोजन होते. त्या दृष्टीने तयारीदेखील सुरू करण्यात आली होती. एक बाजू पूर्ण झाल्याने उर्वरित टप्प्यावर अधिक भर देण्यात आला. हा पूल जवळपास पूर्ण झाला आहे. दुसऱ्या बाजूच्या पुलावर काही ठिकाणी डांबरीकरणही पूर्ण करण्यात आले आहे. काही ठिकाणी रस्ता तयार करण्याचे काम सुरू होते. अलीकडेच झालेल्या पावसामुळे या कामात अडथळे येत होते. दरम्यान, महापालिकेचे अतिरिक्त आयुक्त पृथ्वीराज बी. पी. यांनी प्रकल्प विभागप्रमुख दिनकर गोजारे यांच्यासह सिंहगड रस्त्यावरील उड्डाणपुलाची पाहणी केली.
‘फनटाइमकडून विठ्ठलवाडी चौकाकडे जाणाऱ्या वाहनांसाठीच्या पुलाचे काम अर्धवट होते. प्रामुख्याने दोन्ही बाजूला रॅम्प आणि पुलाखालील रस्त्याच्या काँक्रिटीकरणाचे काम बाकी होते. हे काम आता जवळपास पूर्ण झाले आहे. तूर्तास काही किरकोळ कामे राहिली आहेत. पावसामुळे अडचणी येतात; परंतु हे कामदेखील पुढील दोन आठवड्यांत पूर्ण करून वाहतुकीसाठी हा पूल खुला करण्यात येईल,’ असे पृथ्वीराज बी. पी. यांनी सांगितले.
तिढा सुटणार
कर्वेनगर ते सनसिटी पुलाच्या कामातील भूसंपादनाचा अडथळाही दूर होणार आहे. सनसिटीच्या बाजूस काही जागामालकांसोबतचा भूसंपादनाचा तिढा जवळपास सुटला आहे. येत्या आठवडाभरात याबाबतची प्रक्रिया पार पाडली जाईल.
कोंडीवर अद्याप मार्ग नाही
सिंहगड रस्त्यावर उड्डाणपूल उभारला असला, तरी त्यामुळे कोंडीवर मार्ग निघालेला नाही. महापालिका आणि वाहतूक पोलिस यांनी यावर तोडगा काढण्याचा प्रयत्न केला. मात्र, रहदारीच्या वेळी कोंडी कायम असल्याचे चित्र आहे. पुलाचा तिसरा टप्पा खुला झाल्यानंतर विठ्ठलवाडी चौक व पेट्रोलपंपाजवळ कोंडी होण्याची दाट शक्यता आहे. सध्या येथील पदपथाची रुंदी कमी करण्याचे काम सुरू असल्याने वाहनांच्या रांगा लागत आहेत.