गोरेगाव पूर्वेकडील प्रभाग क्रमांक ५२मध्ये महाराजा टॉवर गल्ली, जनरल ए. के. वैद्य मार्ग, कन्यापाडा या काही भागांत गेल्या काही वर्षांपासून कमी दाबाने पाणीपुरवठा होतो. काही वेळेस तर पाणीही येत नाही. महापालिकेच्या जलअभियंता विभागाशी पत्रव्यवहार केल्यानंतर परिसरात १५० मिमी व्यासाची जलवाहिनी टाकण्याचे काम मंजूर झाले. मात्र या कामाला मुहूर्त मिळालेला नाही. ते लांबणीवरच पडत असल्याने पाण्यासाठी कसरत करण्याशिवाय रहिवाशांकडे पर्याय उरलेला नाही.
हनी ट्रॅप प्रकरणात भाजपचे प्रफुल्ल लोढा अटकेत, एकनाथ खडसेंचं महाजनांकडे बोट; म्हणाले, आरोपी….
सांताक्रूझ पूर्वेकडील मराठा कॉलनीतील पटेल नगरालगत नवजीवन सोसायटी, दौलत सोसायटी आणि शांतीलाल कंपाऊंड आदी भागांतही अत्यंत कमी दाबाने पाणीपुरवठा होत आहे. येथे पाण्याची अधिकृत वेळ पहाटे साडेचार ते सकाळी ११ अशी असली, तरी पाणीपुरवठा मध्येच एक ते दोन तास खंडित होतो. त्यातच खूपच कमी दाबाने पाणी येत असल्याने रहिवाशांना मुबलक पाणी मिळत नाही.

गेल्या काही महिन्यांपासून वांद्रे पूर्वेकडील कलानगरमधील अनेक सोसायट्यांनाही कमी दाबाने पाणीपुरवठा होत आहे. आर्टेक्ट अपार्टमेंटसह अनेक सोसायट्यांचा पाणीपुरवठा कमी झाला आहे. काही वेळा तर टँकर मागवण्याची वेळ येते. शिवडी प्रभाग क्रमांक २०६मधील बहारी इमारत, मॉडर्न इमारत, सिद्धांचल इमारत येथे पहाटे पाणीपुरवठा होतो. परंतु १५ दिवसांपासून येथे कमी दाबाने पाणीपुरवठा होत असल्याने रहिवासी मेटाकुटीला आले आहेत. घाटकोपर पश्चिमेकडील आझादनगर, चिरागनगर, पारशीवाडी आदी भागांतही पाण्याचा दाब कमी आहे.
रक्तपेढ्यांवर आरोग्य विभागाचा बडगा; वार्षिक 2000 युनिट रक्तसंकलन नसेल तर बंदीचे संकेत
‘गोरेगाव प्रभाग क्रमांक ५२मधील अनेक भागांत कमी दाबाने पाणीपुरवठा होत आहे. मात्र पावसाळ्याचे कारण पुढे करून परिसरात १५० मिमी व्यासाची जलवाहिनी टाकण्याच्या खोदकामासाठी परवानगी देण्यात आलेली नाही. येत्या गुरुवारी महापालिकेवर मोर्चा काढून निषेध व्यक्त केला जाईल. टॉवरसाठी पाणीपुरवठा सुरळीत होतो, मग सामान्यांना का नाही’, असा प्रश्न भाजपच्या माजी नगरसेविका प्रीती सातम यांनी उपस्थित केला.
नाशकात महिला पोलिसाच्या लेकीने संपवलं जीवन; आईला लिहिली शेवटची चिठ्ठी, काळीज चिरणारं कारण समोर…
‘बूस्टर लाइन’ची मागणी
‘शिवडीत कमी दाबाने पाणीपुरवठा होत असल्याने महापालिका अधिकाऱ्यांसोबत या समस्येवर कायमस्वरूपी मार्ग काढण्यासाठी चर्चा करण्यात आली. येथील जलवाहिनीवरील दाब वाढवून सुरळीत पाणीपुरवठ्यासाठी ‘बूस्टर लाइन’ टाकण्यात यावी, अशी मागणी महापालिकेकडे केली आहे’, असे शिवसेना (उबाठा) पक्षाचे माजी नगरसेवक सचिन पडवळ यांनी सांगितले.

नेमके कारण काय?
‘मराठा कॉलनी परिसरात कमी दाबाने होणाऱ्या पाणीपुरवठ्यामागील नेमके कारणही महापालिका सांगू शकलेली नाही. पाठपुरावा करून ही समस्या सोडवण्यात महापालिकेला अपयश आले आहे. धरणे भरलेली असूनही कमी दाबाने पाणीपुरवठा का’, असा प्रश्न शिवसेना (उबाठा) पक्षाचे शाखाप्रमुख संदीप शिवलकर यांनी उपस्थित केला.

अपुऱ्या पाण्याने येथे कसरत
गोरेगाव पूर्व : महाराजा टॉवर गल्ली, जनरल ए. के. वैद्य मार्ग, कन्यापाडा
सांताक्रूझ पूर्व : नवजीवन सोसायटी, दौलत सोसायटी आणि शांतीलाल कंपाऊंड
वांद्रे पूर्व : कलानगरमधील अनेक सोसायट्या
शिवडी : बहारी इमारत, मॉडर्न इमारत, सिद्धांचल इमारत
घाटकोपर पश्चिम : आझादनगर, चिरागनगर, पारशीवाडी

सात धरणांतील पाणीसाठा
अप्पर वैतरणा —७६%
मोडक सागर —१००%
तानसा —९१%
मध्य वैतरणा —९४%
भातसा —७७%
विहार —५३%
तुळशी —५४%

पाण्याची स्थिती
८२% मुंबईला पाणीपुरवठा करणाऱ्या धरणांतील पाणीसाठा
१४,४७,०६३ (दशलक्ष लिटर) सातही धरणांची पाणीसाठवण क्षमता
४,००० (दक्षलक्ष लिटर) मुंबईला दररोज होणारा पाणीपुरवठा