राज ठाकरेंच्या मनसे सोबत युती करुन मुंबई महापालिकेतील सत्ता कायम राखण्याच्या प्रयत्नात उद्धवसेना आहे. त्यामुळे मनसे सोबत युती करण्यासंदर्भात उद्धवसेना अधिक सकारात्मक आहे. या संदर्भात उद्धवसेनेकडून एक सर्वेक्षण करण्यात आलं आहे. दोन्ही ठाकरे सोबत आल्यास मुंबई महापालिकेत काय चित्र असू शकेल, याचा अंदाज उद्धवसेनेकडून घेण्यात आलेला आहे.

२०१७ मध्ये झालेल्या मुंबई महापालिका निवडणुकीत शिवसेनेनं ८४ जागा जिंकल्या. त्यावेळी शिवसेना एकसंध होती. २०१७ मध्ये नगरसेवक झालेल्या निम्म्याहून अधिकांनी गेल्या तीन वर्षांत उद्धव यांची साथ सोडत शिंदेसेनेची वाट धरलेली आहे. भाजपनंही मुंबईत ताकद वाढवली आहे. ठाकरेंचा पक्ष सत्तेत नसल्यानं आव्हान मोठं आहे. त्या पार्श्वभूमीवर राज ठाकरे यांच्या पक्षाशी युती केल्यास काय होईल, याचा आढावा उद्धव ठाकरेंच्या शिवसेनेकडून सर्वेक्षणातून घेण्यात आला आहे.

मुंबईत ५ जुलैला झालेल्या विजयी मेळाव्यानंतर शिवसेना उबाठानंतर सर्व्हे केला गेला. त्यानुसार ठाकरे बंधूंची युती झाल्यास त्यांना १०० पेक्षा अधिक जागा मिळतील. विशेष म्हणजे मनसेला २५ हून अधिक जागांवर विजय मिळेल. २०१७ मध्ये मनसेला ७ जागा मिळाल्या होत्या. त्याआधी २०१२ मध्ये मनसेनं २८ जागा जिंकल्या होत्या. मुंबईत हीच मनसेची सर्वोत्तम कामगिरी आहे. युती झाल्यास राज ठाकरे सर्वोच्च कामगिरी पुन्हा नोंदवू शकतात.

२०१७ मध्ये शिवसेनेला ८४ जागा जिंकता आल्या होत्या. गेल्या ८ वर्षांत ठाकरेंच्या शिवसेनेला अनेक मोठे धक्के बसले आहेत. आता युती न झाल्यास उद्धव यांच्या पक्षाला ६५ जागांवर समाधान मानावं लागेल. तर राज यांच्या मनसेला केवळ १० जागा मिळतील. याचा अर्थ दोघांचे मिळून ७५ उमेदवार निवडून येतील. पण युती झालीच तर दोघांच्या जागा १०० च्या वर जातील. याचा अर्थ युती दोघांसाठी फायद्याची असेल. दोघे स्वतंत्र लढल्यास त्याचा फायदा महायुतीला होईल. २०१२ मध्ये मुंबईत भाजपनं ३१ जागा जिंकल्या. २०१७ मध्ये त्यांनी थेट ८२ वर भरारी घेतली. त्यामुळे आगामी निवडणुकीत भाजप किती जागा जिंकणार याची उत्सुकता आहे.