२०१७ मध्ये झालेल्या मुंबई महापालिका निवडणुकीत शिवसेनेनं ८४ जागा जिंकल्या. यातील निम्म्याहून अधिक माजी नगरसेवकांनी ठाकरेंची साथ सोडत शिंदेंच्या शिवसेनेत प्रवेश केलेला आहे. भाजप, शिंदेसेनेनं मुंबईत त्यांची ताकद वाढवण्याचे प्रयत्न सुरु केलेले आहेत. तर दुसरीकडे उद्धव ठाकरे मनसेला सोबत घेण्याच्या प्रयत्नात आहेत. ठाकरे बंधूंची युती झाल्यास काय परिस्थिती असेल, याचा सर्व्हे शिवसेना उबाठाकडून करण्यात आला आहे.

मुंबईच्या वरळीत ५ जुलैला झालेल्या विजयी मेळाव्यानंतर शिवसेना उबाठाकडून मुंबईत सर्व्हे करण्यात आला. दोन बंधूंनी एकत्र येऊन निवडणूक लढवल्यास त्यांना १०० पेक्षा अधिक जागा मिळतील, अशी आकडेवारी सर्वेक्षणातून समोर आलेली आहे. विशेष म्हणजे मनसे ला २५ पेक्षा अधिक जागा मिळण्याचा अंदाज वर्तवण्यात आलेला आहे. मुंबईत २०१२ मध्ये महापालिका निवडणुकीत मनसेनं २८ जागा जिंकल्या होत्या. हीच मनसेची मुंबई महापालिकेतील सर्वोत्तम कामगिरी राहिली आहे. उद्धव ठाकरेंच्या पक्षासोबत युती केल्यास मनसे त्यांच्या सर्वोच्च कामगिरीच्या जवळ जाऊ शकते.

२०१७ मध्ये झालेल्या निवडणुकीत एकसंध शिवसेनेनं ८४, तर भाजपनं ८२ जागा जिंकल्या होत्या. तर मनसेला केवळ ७ जागा मिळाल्या होत्या. ठाकरे बंधू एकत्र आल्यास त्यांना १०० हून अधिक जागांवर यश मिळेल, असा अंदाज आहे. मराठी मतदार बहुसंख्य असलेल्या गिरगाव, माझगाव, ताडदेव, लालबाग, परळ, भोईवाडा, दादर, माहीम, जोगेश्वरी, वांद्रे, मागाठाणे, गिरगाव, मुलुंड पूर्व, भांडूप, कांजूरमार्ग, विक्रोळी यासारख्या भागांमध्ये ठाकरे बंधूंच्या पक्षांना यश मिळू शकतं. याचा सगळ्यात मोठा फटका शिंदेसेनेला बसेल.

ठाकरे बंधूंची युती न झाल्यास त्याचा फटका दोन्ही ठाकरेंना बसेल. राज यांच्या मनसेला केवळ १० जागांवर यश मिळू शकेल. तर उद्धव यांच्या पक्षाला ६५ जागांवर यश मिळण्याची शक्यता आहे. मुंबई महापालिकेत एकूण २२७ जागा आहेत. सत्ता स्थापनेसाठी ११४ जागांचा आकडा गाठणं गरजेचं आहे.