विशाल उरकुडे यांनी 2022 मध्ये सावकार बालू याच्याकडून 30 लाख रुपये घेतले. याबदल्यात त्यांनी बहादुरामधील प्लॉट आणि नरसाळा परिसरातील चार दुकाने गहाण ठेवली. ते बालू याला महिन्याला 56 हजार रुपये द्यायला लागले. त्यांनी एकूण 13 लाख 44 हजार रूपये बालूला दिले. दरम्यान विशाल यांची आर्थिक परिस्थिती खालावली. त्यामुळे बालूला पैसे देण्यास ते असमर्थ झाले. त्यामुळे बालू संतापला. संपत्ती आपल्या नावावर करण्यासाठी बालू हा विशाल यांना धमकवायला लागला. त्याने विशाल यांच्या दुकानांवर ताबाही घेतला.

बालू आणि त्याच्या साथीदारांनी मंगळवारी सकाळी विशाल यांचे अपहरण केले. त्यांना क्रमांकाच्या कारमध्ये डांबले. त्यांना मारहाण करायला सुरूवात केली. आरोपींनी विशाल यांना उमरेड मार्गावरील उंबरगांव येथील फार्म हाऊसमध्ये डांबले. तेथेही त्यांना काठीने मारहाण केली.

दरम्यान, विशाल यांचे अपहरण झाल्याची माहिती नातेवाईकांना मिळाली. नातेवाइकांनी हुडकेश्वर पोलीस ठाणे गाठून वरिष्ठ पोलीस निरीक्षक ज्ञानेश्वर भेदोडकर यांना माहिती दिली. भेदोडकर यांनी विशाल यांच्या मोबाइलवर संपर्क साधला. तो बंद होता. नातेवाईकांनी बालूबाबत माहिती देत त्याचा मोबाइल क्रमांक पोलिसांना दिला. पोलिसांनी बालूचे लोकेशन काढले. तो दिघोरी पुलाजवळ असल्याचे निष्पन्न झाले. पोलिसांनी सापळा रचून विशाल यांची सुटका केली. पोलिसांनी बालूसह चौघांना अटक केली. पोलिसांनी चौघांना बुधवारी न्यायालयात हजर केले. न्यायालयाने त्यांची 18 जुलैपर्यंत पोलीस कोठडीत रवानगी केली.