नागपूर जिल्ह्याच्या कळमेश्वर पोलिस ठाण्याच्या हद्दीतील बोरगाव उगले परिसरात कार्तिक शिवशंकर लाडसे (१८) रा. उप्पलवाडी हा युवक बुधवारी पहाटे गावातील नाला पार करीत असताना पाण्याच्या प्रवाहात तो वाहून गेला. पोलिस व राज्य आपत्ती व्यवस्थापन दलाच्या जवानांनी शोध घेतला असता त्याचा मृतदेह सापडला. दुसरी घटना सावनेर पोलिस ठाण्याच्या हद्दीतील बोरगाव बुजुर्ग येथे घडली. अनिल हनुमंत पानपत्ते (३५) हे बुधवारी सकाळी गावातील नाला पार करीत असताना वाहून गेले. रात्री उशिरापर्यंत बचाव पथके त्यांचा शोध घेत होते.

वर्धा जिल्ह्याच्या कारंजा तालुक्यातील बोदरठाण येथील नाल्याला आलेल्या पुरात प्रफुल्ल शेंद्रे (३५) यांचा वाहून गेल्याने मृत्यू झाला. यवतमाळच्या झरी-जामणी तालुक्यातील धानोरा येथील नाल्याला आलेल्या पुरात सतीश दुर्गावार (वय ३५) हे वाहून गेले. दुर्गावार हे बुधवारी सकाळी शेतावर जाण्यासाठी घरून निघाले होते. नाल्यातून जात असताना त्यांचा तोल गेल्याने वाहून गेले. त्यांचा शोध सुरू आहे. गडचिरोली जिल्ह्याच्या आरमोरी तालुक्यातील देशपूर येथील राजू तुमराम हे शेतावरून घरी परत येत असताना वडदा गावाजवळ नाल्याच्या पुरात वाहून गेले. प्रशासनाकडून त्यांचा शोध घेतला जात आहे.

गोंदिया-सडक अर्जुनी मार्गावर रस्त्याच्या कडेला असलेले एक झाड कारवर कोसळल्याने दोघांचा मृत्यू तर तिघे गंभीर जखमी झाले. वासुदेव मसाराम खेडकर (६०) आणि आनंद मनिराम राऊत (५०) रा. सडक-अर्जुनी अशी मृतांची नावे आहेत. तर रितिक राजेश दिघोरे (२२) रा. सडक-अर्जुनी व राजू रूपलाल चौरागडे (४६) व अनिल रामकिसन चौधरी (४६) हे तिघे जखमी झाले आहेत. त्यांना सडक-अर्जुनीच्या ग्रामीण रुग्णालयात दाखल करण्यात आले आहे. या अपघाताने या मार्गावरील वाहतूक काही काळ प्रभावित झाली होती.

मुसळधार पावसामुळे गावाला जोडणाऱ्या रस्त्यावर चिखल पसरल्याने वाहन येऊ शकत नव्हते. परिणामी एका वृद्धाला खाटेवरून रुग्णालयात न्यावे लागल्याची संतापजनक घटना यवतमाळ जिल्ह्याच्या उमरखेड तालुक्यातील जनुना वरुडबिबी येथे बुधवारी घडली. बाबुराव मेंढके (६७) असे या रुग्णाचे नाव आहे.