आशिया खंडातील सगळ्यात श्रीमंत महापालिका असलेल्या मुंबई महापालिका झेंडा फडकवण्यासाठी भाजप , शिंदेसेनेनं कंबर कसली आहे. २०१७ मध्ये झालेल्या मुंबई महापालिका निवडणुकीत शिवसेना आणि भाजप स्वबळावर लढले. तेव्हा दोन्ही पक्ष राज्यात सत्तेत होते. भाजपनं ८२, तर एकसंध असलेल्या शिवसेनेनं ८४ जागा जिंकल्या. यानंतर शिवसेनेनं बहुमताची जुळवाजुळव करत सत्ता स्थापन केली.

२०२२ मध्ये शिवसेनेत उभी फूट पडली. त्यानंतर आमदार, खासदारांपाठोपाठ एकनाथ शिंदे यांनी मुंबईतील शिवसेनेचे नगरसेवक गळाला लावले. मागील विधानसभा निवडणुकीत ठाकरेंना पराभव पाहावा लागला. शिंदेंची शिवसेना सत्तेत कायम राहिली आणि शिंदे अधिक आक्रमकपणे माजी नगरसेवकांचे पक्षप्रवेश उरकले. २०१७ मध्ये निवडून आलेले शिवसेनेचे निम्म्याहून अधिक नगरसेवक सध्या शिंदेंसोबत आहेत.

२०१७ मध्ये निवडून आलेल्या नगरसेवकांचा कार्यकाळ २०२२ मध्ये संपला. २०१२ आणि २०१७ मध्ये विजयी झालेले सेनेचे नगरसेवक मोठ्या संख्येनं शिंदेंकडे गेलेले आहेत. या माजी नगरसेवकांचा आकडा १०७ च्या घरात गेला आहे. त्यामुळे शिंदेसेनेनं भाजपकडे महापालिका निवडणुकीसाठी १२० जागांची मागणी केल्याची सुत्रांची माहिती आहे. मुंबई महापालिकेत एकूण २२७ प्रभाग आहेत.

शिंदेसेनेनं भाजपकडे सुरुवातीलाच १२० जागा मागितल्या आहेत. गेल्या निवडणुकीत जिंकलेल्या ८४ आणि अधिकच्या काही जागा शिंदेसेनेला हव्या आहेत. शिंदेसेनेची मागणी ऐकून भाजपकडे चलबिचल सुरु झाली आहे. मुंबई महापालिका एकहाती जिंकण्याचं भाजपचं स्वप्न आहे. ठाकरे मुंबईत कमजोर झाल्यानंतर मायानगरीत शिवसेना नाममात्र ठेवण्याचा भाजपचा प्रयत्न आहे. पण शिंदेंनी १०७ माजी नगरसेवकांना घेऊन बाजी मारण्याची तयारी केली आहे.

शिंदेसेनेला ९० ते १०० जागा सोडल्यास मुंबईत १०० चा आकडा पार करण्याचं भाजपचं स्वप्न अधुरं राहू शकतं. त्यामुळे स्वबळावरील सत्ताही हुलकावणी देऊ शकते. मुंबईत शिवसेना मजबूत झाल्यास २०२९ मध्ये त्यांचा मोठा अडथळा असेल. कारण २०२९ मध्ये भाजप स्वबळावर लढणार आहे. त्यामुळे शिंदेसेनेला मुंबईत फार पाय रोवू द्यायचे नाहीत, असा प्रयत्न भाजपचा आहे. पण शिंदेंचं आक्रमक राजकारण पाहता यामुळ खटके उडण्याची शक्यता जास्त आहे.