शिवसेना उबाठाचे प्रमुख उद्धव ठाकरे आणि मनसे प्रमुख राज ठाकरे गेल्या शनिवारी एका व्यासपीठावर सोबत आले. सरकारनं हिंदी भाषा सक्तीचा जीआर मागे घेतल्यानंतर दोन्ही ठाकरेंच्या पक्षांकडून विजयी मेळाव्याचं आयोजन करण्यात आले. त्या कार्यक्रमात दोन्ही ठाकरेंची भाषणं झाली. उद्धव ठाकरेंनी मनसेसोबत युतीचे स्पष्ट संकेत दिले. त्यानंतर आता शिंदेंची शिवसेना सावध झाली आहे.

उद्धव ठाकरेंनी युतीसाठी हात पुढे केलेला आहे. पण अद्याप त्याला राज ठाकरेंनी प्रतिसाद दिलेला नाही. ठाकरे बंधूंची युती होण्याची दाट शक्यता लक्षात घेता शिंदेसेनेनं त्यांचा मुकाबला करण्याची तयारी आतापासूनच सुरु केलेली आहे. मुंबई, ठाणे, पुणे, नाशिक आणि छत्रपती संभाजीनगरमध्ये शिंदेसेनेला ठाकरेंच्या युतीचा फटका बसू शकतो. त्यामुळे या पाचही ठिकाणी शिंदेसेनेचे नेते अधिक सक्रिय झालेले आहेत.

शिंदेसेनेकडून ठाकरेंच्या शिवसेनेच्या नेत्यांशी संपर्क साधले जाऊ लागले आहेत. ‘येत्या काही दिवसांत मुंबई, ठाणे, पुणे, छत्रपती संभाजीनगर, नाशिकमधील विरोधी पक्षातील नेते आमच्या पक्षात येतील. कार्यकर्त्यांचेही पक्षप्रवेश होतील. स्थानिक स्वराज्य संस्थांच्या निवडणुका लढवण्यासाठी अनेक जण इच्छुक आहेत. निवडणुकांच्या तारखा जाहीर होण्यापूर्वी ही मंडळी पक्षांतर करतील,’ असं शिवसेनेच्या वरिष्ठ नेत्यानं ‘टाइम्स ऑफ इंडिया’ला सांगितलं.

आमच्या काही नेत्यांनी उबाठाच्या पदाधिकारी, कार्यकर्त्यांशी संपर्क साधले आहेत. आमचे नेते सातत्यानं त्यांच्या संपर्कात आहेत, अशी माहिती शिंदेसेनेच्या नेत्यानं दिली. विधानसभा निवडणुकीत शिंदेसेनेला घवघवीत यश मिळाल्यानंतर त्यांनी ऑपरेशन टायगर हाती घेत ठाकरेंचे अनेक शिलेदार गळाला लावले होते. विधानसभेला पराभूत झालेल्या अनेक नेत्यांना शिंदेसेनेत प्रवेश देण्यात आला.