बुलढाणा जिल्ह्यातील देऊळगाव राजा गल्लीमध्ये अनेकांच्या अंगा खांद्यावर खेळणारी सर्वांची लाडकी २ वर्षीय निरागस ईश्वरी अंकुश हरणे रा. त्र्यंबकनगर या चिमुकलीचा 3 जुलै रोजी सायंकाळी पाण्याच्या हौदात बुडून दुर्दैवी मृत्यू झाला. सायंकाळची वेळ असल्यामुळे ईश्वरीची आई घरातील काम करत होती. ईश्वरी समोरच्या हॉलमध्ये बसलेली असतांना खेळत खेळत ती अचानक ती बाहेर निघून गेली. दोन तास ईश्वरीचा शोध घेऊन सुद्धा ती मिळत नसल्याने अखेर नातेवाईकांनी देऊळगाव राजा पोलीस स्टेशनला धाव घेतली.

या घटनेची प्रभारी ठाणेदार आशिष रोही यांनी तात्काळ दखल घेऊन घटनास्थळी धाव घेत पोलिसांचा फौजफाटा घेऊन चौकशी सुरू केली. आजूबाजूला असलेल्या पाण्याच्या हौदाची पाहणी करत असतांना पाण्याच्या हौदातचं ईश्वरीचा मृत्यूदेह आढळून आला. तिला तात्काळ देऊळगाव राजा ग्रामीण रुग्णलयात दाखल करण्यात आले. परंतु तेथे नेण्या अगोदरच तिची प्राणज्योत मालवली होती. या घटनेमुळे परिसरात हळहळ व्यक्त आहे.

काही दिवसांपूर्वी बुलढाण्यात दुर्घटना घडली होती. खामगाव शहरातील जामोदे कुटुंबातील माय लेकीवर काळाने घाला घातला होता. देवदर्शनासाठी मलकापूरमधील निंबा देवी येथे गेलेल्या मायलेकीचा विश्वगंगा नदीत दुर्दैवी मृत्यू झाला होता. पुनम मयूर जामोदे वय वर्ष 32 व चिमुकली आर्वी जामोदे वय वर्ष 5 यांच्यासह निंबा देवी संस्थान येथे देवीच्या दर्शनासाठी गेले होते. नदी पात्राजवळ आई पुनम जामोदे आणि चिमुकली आर्वी हे दोघे पाय धुण्यासाठी गेले असता पाण्यात खेळताना चिमुकली आर्वी हिचा पाय खोलात गेला आणि ती पाण्यात बुडाली मुलीला वाचविण्यासाठी आईने सुद्धा पाण्यात उडी घेतली असता ती सुद्धा पाण्यामध्ये वाहून गेली.