पोलिसांनी दिलेल्या माहितीनुसार, अटक करण्यात आलेल्या महिलेचे नाव रश्मी आनंद खत्री (वय ४९, रा. गोविंदगड, उप्पलवाडी) आहे. काही वर्षांपूर्वी त्या हॉटेल पॅराडाईजमध्ये व्यवस्थापक म्हणून कार्यरत होत्या. पण काही महिन्यांपूर्वी तिने हे हॉटेल मूळ मालकाकडून भाड्याने चालवण्यासाठी घेतले. त्यानंतर तिने दिल्लीतील कृष्णकुमार उर्फ राधे देशराज यांच्याशी संपर्क साधून हॉटेलमधून देहव्यापाराचा व्यवसाय सुरू केला. पोलीस तपासानुसार, ग्राहकांच्या मागणीनुसार, परदेशातील महिलांना नागपुरात बोलावून त्यांच्याकडून देहव्यापार घडवून आणण्यात येत होता. यासाठी मुख्यतः व्हॉट्सॲप चॅटचा वापर करून व्यवहार होत असल्याचे उघड झाले आहे.

२ जुलै रोजी सायंकाळी सात वाजताच्या सुमारास गुन्हे शाखेच्या सामाजिक सुरक्षा पथकाने सापळा रचून हॉटेल पॅराडाईजच्या चौथ्या मजल्यावरील रूम क्रमांक ४०३ मध्ये छापा टाकला. यावेळी उझबेकिस्तान येथून आलेल्या महिलेला पोलिसांनी ताब्यात घेऊन तिची सुटका केली. सदर महिला मंगळवारीच दिल्लीतून नागपुरात दाखल झाली होती. सुटका करण्यात आलेल्या महिलेची वैद्यकीय तपासणी करून तिला सुरक्षित स्थळी हलविण्यात आले आहे.

या कारवाईत पोलिसांनी आरोपी महिलेचा मोबाईल, व्हॉट्सॲप चॅटमधील संभाषणे, तसेच अन्य पुरावे जप्त केले आहेत. दरम्यान, या प्रकरणातील प्रमुख सूत्रधार कृष्णकुमार उर्फ राधे देशराज सध्या फरार आहे. त्याच्या शोधासाठी विशेष पथक तैनात करण्यात आले आहे. या प्रकरणी तहसील पोलीस ठाण्यात पीटा आणि विविध कलम अंतर्गत अंतर्गत गुन्हा नोंदविण्यात आला आहे. नागपूर शहरातील अशा अनैतिक धंद्यांवर पोलिसांकडून कठोर कारवाई सुरू असल्याचे अधिकाऱ्यांनी सांगितले.