राजेंद्र मुळक यांचे कमबॅक का महत्त्वाचं?
राजेंद्र मूळक हे काँग्रेसमधील जुने आणि अनुभवी नेते आहेत. मागील विधानसभा निवडणुकीत त्यांनी रामटेक मतदारसंघातून अपक्ष उमेदवारी दाखल केली होती. हा मतदारसंघ महाविकास आघाडीच्या वाटपात शिवसेनेला मिळाला होता, मात्र मूळक यांनी काँग्रेसच्या निर्णयाला विरोध केला होता. परिणामी, काँग्रेसने त्यांना सहा वर्षांसाठी पक्षातून निलंबित केले होते. तरीही नागपूर आणि विदर्भातील काँग्रेसच्या राजकारणात मूळक यांचा प्रभाव कायम होता. त्यांच्या स्थानिक जनसंपर्कामुळे आणि विविध समाजघटकांमध्ये असलेली पकड काँग्रेसला आगामी निवडणुकांत फायदा होईल, अशी पक्षातील नेत्यांची अपेक्षा आहे.

काँग्रेसचे राष्ट्रीय अध्यक्ष मल्लिकार्जुन खर्गे यांच्या उपस्थितीत दिल्ली येथे मूळक यांच्या पुनरागमनाची अधिकृत घोषणा झाली. प्रदेशाध्यक्ष हर्षवर्धन सपकाल यांनी मूळक यांचे स्वागत करताना म्हटले, “राजेंद्र मूळक हे काँग्रेसचे जुने आणि निष्ठावंत कार्यकर्ते आहेत. त्यांच्या पुनरागमनामुळे पक्ष आणखी बळकट होईल. मतभेद विसरून एकत्र येणे ही काळाची गरज आहे.”

भाजपकडूनऑपरेशन कमळ, शिवसेना शिंदे गटाकडून ऑपरेशन टायगर राबविले जात असताना काँग्रेसचा गड असलेल्या विदर्भात स्थानिक स्वराज्य संस्थांच्या निवडणुकीत लक्ष केंद्रीत केले आहे. त्यामुळे मूळक यांची वापसी झाली आहे. तसेच विदर्भात शिवसेना ठाकरे गट आणि शरद पवार यांचा प्रभाव फारसा नाही. हर्षवर्धन सपकाळही विदर्भाचे असल्याने या भागावर त्यांचे विशेष लक्ष्य आहे.

दुसरीकडे, राष्ट्रवादी काँग्रेस अजित पवार गटातही बंडखोर नेत्याचे पुनरागमन झाले. आभा पांडे या महिला नेत्या 2024च्या विधानसभेच्या निवडणुकीत भाजपच्या उमेदवाराविरुद्ध अपक्ष म्हणून मैदानात उतरल्या होत्या. पक्षशिस्त भंग केल्यामुळे त्यांचे निलंबन करण्यात आले होते.