साचापीर स्ट्रीट, ओएसिस हॉटेल शेजारील बिल्डिंग क्र. 495/496 या ठिकाणी सुरू असलेल्या अनधिकृत आणि असुरक्षित बांधकामस्थळी मोठी दुर्घटना घडली आहे. या दुर्घटनेत एका तरुण मजुराचा जागीच मृत्यू झाला असून, चार कामगार गंभीर जखमी झाले आहेत. या घटनेनंतर स्थानिक नागरिक, सामाजिक कार्यकर्ते आणि राजकीय प्रतिनिधींनी संताप व्यक्त करत बिल्डर राणावत आणि मेहता तसेच पुणे कॅन्टोन्मेंट बोर्डच्या संबंधित अधिकाऱ्यांविरोधात सदोष मनुष्यवधाचा गुन्हा दाखल करण्याची मागणी केली आहे.

विशेष बाब म्हणजे, याच ठिकाणी यापूर्वीही अशाच स्वरूपाची दुर्घटना घडली होती आणि त्यामध्ये देखील एक कामगार मरण पावला होता. मात्र, ती घटना बिल्डर आणि अधिकाऱ्यांनी दबवली होती, असा गंभीर आरोप स्थानिक नागरिक नरेश जाधव व कार्यकर्ते दिनेश परदेशी यांनी केला आहे. घटनेची माहिती मिळताच स्थानिकांनी पोलिसात संपर्क केला.
Ratnagiri News: रत्नागिरीत किल्ल्यावरुन पडलेल्या तरुणीबाबत मोठे अपडेट; बँक कर्मचाऱ्याला फोन, नाशिक कनेक्शनही उघड
बांधकाम सुरू करताना कोणतीही सुरक्षा व्यवस्था नव्हती. मजुरांच्या जीवाशी खेळ केला जातो आहे, याची जबाबदारी बिल्डर आणि अधिकाऱ्यांवरच आहे, असा आरोप या दोघांनी केला.

दुर्घटना घडली त्या ठिकाणी हेल्मेट, सेफ्टी बेल्ट, जाळी किंवा संरक्षक भिंती यांसारखी कोणतीही सुरक्षा उपाययोजना करण्यात आलेली नव्हती. बांधकाम सुरू असतानाच स्लॅब कोसळल्याने ही दुर्घटना घडली, अशी प्राथमिक माहिती आहे.

घटनेनंतर परिसरात संतापाचे वातावरण असून, दोषींवर गुन्हा दाखल करून कठोर कारवाईची मागणी स्थानिकांनी केली आहे. घटनेची सखोल चौकशी करून बिल्डर व संबंधित अधिकाऱ्यांवर सदोष मनुष्यवधाचा गुन्हा दाखल करावा, अशी मागणी स्थानिक नागरिक आणि सामाजिक कार्यकर्ते करत आहेत.