स्थानिक स्वराज्य संस्थांच्या निवडणुकीच्या तोंडावर शिवसेनेचे नेते उपमुख्यमंत्री एकनाथ शिंदे यांनी ठाकरे गटातील पदाधिकारी व कार्यकर्त्यांसह काँग्रेस आणि आपचे पदाधिकाऱ्यांना पक्षात घेऊन धक्का दिला. भाजपचा गड असलेल्या नागपुरात शिंदे गटाने शनिवारी शक्तिप्रदर्शन करून स्थानिक स्वराज संस्थांच्या निवडणुकीतील दावेदारी आणखी मजबूत केली.

पाच हजार शिवसैनिकांचा प्रवेश
शिवसेना ठाकरे गटाचे माजी शहर प्रमुख राजू तुमसरे यांच्यासह माजी नगरसेवक अजय दलाल, परसराम बोकडे, अलका दलाल, राजेश बोकडे, गडचिरोली येथील ठाकरे गटाचे जिल्हाप्रमुख सुरेंद्र चंदेल तसेच, मोठ्या प्रमाणात शिवसैनिक व अन्य पक्षाचे कार्यकर्त्यांनी धनुष्यबाण हातात घेतले. शिक्षक संघटनेच्या ४० सदस्यांनी प्रवेश केला. विद्युत कर्मचारी सेनेचे मार्गदर्शक आमदार कृपाल तुमाने यांच्या नेतृत्वाखाली पाच हजार कर्मचारी व अधिकाऱ्यांनी शिवसेनेत प्रवेश केल्याचा दावा करण्यात आला.यावेळी बोलताना शिंदे यांनी ठाकरे गटावर चौफेर हल्ला चढवत कुणी शिल्लक राहिले आहे का, असा सवाल केला.

शिवसेना मालक नोकराची नाही तर, शिवसैनिकांची
आपली शिवसेना मालक नोकराची नाही तर, शिवसैनिकांची आहे. ‘राजा का बेटा राजा नही, जो काम करेगा वो राज करेगा’ अशा विचारांची आपली शिवसेना आहे. आपल्या सेनेचे कार्यकर्ते सवंगडी आहेत, घरगडी नाही, असे टोले शिंदे यांनी लगावले. राजू तुमसरे रामटेक लोकसभा मतदारसंघाचे माजी खासदार व माजी जिल्हा प्रमुख प्रकाश जाधव यांचे विश्वासू सहकारी मानले जातात.