ही पोस्ट काँग्रेसच्या अंतर्गत घडामोडींचा उघडपणे पर्दाफाश करत असून, स्थानिक पदाधिकाऱ्यांकडे दुर्लक्ष आणि दिल्लीवरून लादल्या जाणाऱ्या नेत्यांमुळे कार्यकर्त्यांमध्ये प्रचंड असंतोष पसरलेला दिसतो आहे.

गटबाजी आणि नेतृत्वातील दरीचा परिणाम
माजी आमदार रवींद्र धंगेकर आणि संग्राम थोपटे यांनी काँग्रेसचा राजीनामा देत शिवसेना आणि भाजपमध्ये प्रवेश केल्यानंतर काँग्रेसचा पुणे जिल्ह्यातील संख्याबळ पूर्णपणे संपले. काँग्रेसचा एकही आमदार सध्या पुण्यात नाही. या राजकीय दुष्काळात स्थानिक पातळीवर निष्ठावान कार्यकर्ते, पदाधिकारी ज्या प्रकारे दुर्लक्षित केले जात आहेत, त्यातून राहुल शिरसाट यांची प्रतिक्रिया ही फक्त सुरुवात वाटत आहे.

संगीता तिवारींनी व्यक्त केली नाराजी
या पार्श्वभूमीवर महिला काँग्रेसच्या प्रदेश उपाध्यक्ष संगीता तिवारी यांनीही नुकतीच माहिती देत शहराध्यक्ष प्रती नाराजी व्यक्त केली होती. स्थानिक नेतृत्वाच्या कार्यपद्धतीवर त्यांनी थेट प्रश्नचिन्ह उपस्थित केले. यावरून काँग्रेसमध्ये संघटनात्मक आणि निर्णय प्रक्रियेत गंभीर विसंगती आहे हे अधोरेखित होते.

राहुल शिरसाट कोण?
राहुल शिरसाट हे युवक काँग्रेसमधील आघाडीचे नेते असून, पंतप्रधान नरेंद्र मोदी, केंद्रीय गृहमंत्री अमित शहा किंवा राज्यातील भाजप नेत्यांच्या पुणे दौऱ्यांदरम्यान काळे झेंडे दाखवणं, रास्ता रोको, निदर्शनं यामध्ये ते अग्रभागी होते. अनेकदा पोलीस कारवाईलाही सामोरे गेलेले शिरसाट हे काँग्रेसच्या रस्त्यावरच्या लढवय्या प्रतिमेचे मूळ चेहरा होते. त्यामुळे त्यांची संभाव्य एक्झिट ही पक्षासाठी केवळ इमेजचा नाही, तर कार्यकर्त्यांमध्ये उत्साह संपवणारी ठरू शकते.

वाढणारी नाराजी आणि संभाव्य राजीनाम्यांचे सावट
राहुल शिरसाट यांनी आपल्याशी संवाद साधताना स्पष्ट केलं की, “वर्षानुवर्षे पक्षासाठी रस्त्यावर उतरून काम करणाऱ्यांना डावललं जातं, आणि हक्काच्या पदांवर निष्ठा नसलेल्या मंडळींची वर्णी लागते. आमच्या भावना वरिष्ठांपर्यंत पोहोचवल्या पण काहीच बदल झाला नाही. त्यामुळे पुढील निर्णय स्वाभिमान जपण्यासाठी घेतला जाईल.”त्यांच्या वक्तव्यामुळे युवक काँग्रेसमधील आणखी काही पदाधिकारी आणि कार्यकर्तेही पक्षाला रामराम करणार का, याकडे सगळ्यांचे लक्ष लागले आहे.

राजकीय भूकंपाची नांदी?
सध्या महाराष्ट्रात काँग्रेसला भाजप आणि शिंदे गटाकडून सतत आव्हान दिलं जात आहे. अशातच पक्षांतर्गत गटबाजी, नेतृत्वातील अंतर, निष्ठावंत कार्यकर्त्यांचा अपमान हे सगळं मिळून काँग्रेससाठी नव्या राजकीय संकटांची नांदी ठरू शकतं.