प्लेग, कोरोना आणि चिचंपोकळी
1896 साली प्लेगच्या रोगाने मुंबईत थैमान घातले होते. त्यावेळी चिंचपोकळी स्थानकावर प्लेगच्या रुग्णांसाठी विशेष व्यवस्था करण्यात आली होती. ज्यावेळी ट्रेन येत असे त्यावेळी प्रत्येक प्रवाश्याची चाचणी केली जात असे. जर व्यक्तीला प्लेगची लागण झालेली असेल तर त्याला तात्काळ जवळच्या रुग्णालयात दाखल केले जात होते. जेथे साथीच्या रुग्णावर उपचार केले जात होते. ते रुग्णालय आजचे कस्तुरबा रुग्णालय. कोरोनाच्या काळातही कस्तुरबा रुग्णालयाचे योगदान महत्त्वाचे होते.1926 पासून हे रुग्णालय मुंबई महापालिकेच्या अखत्यारीत आहे.

चिंचपोकळीची ओळख
चिंचपोकळी भागात मोठया प्रमाणात गिरणी कामगारांची वस्ती होती. त्यामुळे या भागावर मराठी संस्कृतीचा विशेष ठसा आहे. या परिसरात वर्षानुवर्षे गणेशोत्सव मोठ्या उत्साहात साजरा केला जातो. चिंचपोकळीचा चिंतामणी या सार्वजनिक गणेशोत्सव मंडळाची आगमनाधीश म्हणून ओळख आहे. लाखो गणेशभक्त चिंचपोकळीच्या चिंतामणीच्या आगमन सोहळ्याला उपस्थित असतात. चिंचपोकळी सार्वजनिक उत्सव मंडळाची स्थापना 1920 मध्ये करण्यात आली होती. चिंतामणीचे आगमन या परिसराची सांस्कृतिक ओळख झाली आहे. आता या भागाचा मोठ्या प्रमाणात विकास होताना दिसत आहे. एका बाजूला चाळी तर एका बाजूला उभ्या असलेल्या टोलेजंग इमारती येथे पाहायला मिळतात.