Pune Crime News : पुण्यात सोनसाखळी चोरांचा धुमाकूळ सुरू आहे. कोथरूड आणि पाषाण परिसरात ज्येष्ठ नागरिक व महिलांना लक्ष्य केले जात आहे. चोरटे सोनसाखळी हिसकावून पसार होत आहेत. पाषाणमध्ये एका वृद्धाची, तर कोथरूडमध्ये एका महिलेची सोनसाखळी चोरीला गेली. अलंकार पोलीस ठाण्याच्या हद्दीतही महिलेच्या गळ्यातील दागिने चोरले. पोलिसांनी गुन्हे दाखल करून तपास सुरू केला आहे. यामुळे नागरिकांमध्ये भीतीचे वातावरण पसरले आहे.
- फिरायला जाताना शक्यतो दोन किंवा अधिक जणांनी एकत्र जावे.
- गर्दी नसलेल्या रस्त्यांवर जाणे टाळावे.
- महागडे दागिने घालून चालायला जाऊ नये,
- मोबाइल फोन खिशामध्ये ठेवावा.
- आजूबाजूच्या हालचालींवर लक्ष ठेवावे, संशयास्पद व्यक्ती दिसल्यास सतर्क व्हावे.
पाषाणच्या पंचवटी सोसायटीत वृद्धाची सोनसाखळी हिसकावली
चतुःशृंगी पोलिस ठाण्याच्या हद्दीतील पंचवटी (पाषाण) सोसायटी परिसरात रविवारी सकाळी सव्वासहाच्या सुमारास ७० वर्षांची व्यक्ती चालत होती. रस्त्याच्या कडेने चालत असताना, दुचाकीवरून आलेल्या दोन अनोळखी तरुणांनी पत्ता विचारण्याच्या बहाण्याने त्यांना थांबवले. मागे बसलेल्या तरुणाने अचानक वृद्धाच्या गळ्यातील सोन्याची साखळी हिसकावली. त्यानंतर दोघे दुचाकीवरून पळून गेले. चोरीस गेलेल्या साखळीची किंमत अंदाजे ८० हजार रुपये होती. या प्रकरणी वृद्धाने दिलेल्या तक्रारीवरून गुन्हा दाखल करण्यात आला आहे. या घटनेची माहिती मिळताच सहायक निरीक्षक दबडे आणि चतुःशृंगी पोलिस ठाण्यातील अधिकाऱ्यांनी घटनास्थळी पाहणी केली.
Baramati News : तरुण शेतकऱ्याला टोळीकडून बेदम मारहाण, पायाला दुखापत अन्…; पोलिसांत धाव घेऊनही आरोपी मोकाट
कोथरूडला ६९ वर्षांची महिला लक्ष्य
सोनसाखळी चोरीची दुसरी घटना कोथरूडमध्ये लोहिया जैन आयटी पार्कजवळ घडली. या प्रकरणी ६९ वर्षांच्या महिलेने तक्रार दिली आहे. त्यावरून अज्ञातावर गुन्हा दाखल झाला आहे. तक्रारदार मॉर्निंग वॉकसाठी घराबाहेर पडल्या होत्या. पौड फाट्याकडे जाणारा रस्ता ओलांडून त्या थांबल्या होत्या. त्या वेळी दुचाकीवरून आलेल्या दोघांनी त्यांच्याजवळ येऊन गळ्यातील सोन्याचे मंगळसूत्र हिसकावले आणि पसार झाले. सहायक पोलिस निरीक्षक बालाजी सानप याचा तपास करीत आहेत.
तुला जिवंत सोडणार नाही… मुलाला धमकी अन् काही वेळातच भयंकर घडलं, पुण्यात खळबळ
दोन तोळे वजनाचे दागिने दशभुजा मंदिराजवळ हिसकावले
तिसरी घटना अलंकार पोलिस ठाण्याच्या हद्दीतील दशभुजा गणपती मंदिराजवळ रविवारी सकाळी सव्वासहाच्या सुमारास घडली. कोथरूडच्या राऊतवाडीत राहणारी ४३ वर्षांची महिला मुलासोबत सकाळी घराबाहेर पडली होती. मुलगा देवपूजेसाठी फुले विकत घेत असल्याने, त्या दशभुजा गणपती मंदिराजवळ थांबल्या होत्या. त्या वेळी पाठीमागून चालत आलेल्या एकाने त्यांच्या गळ्यातील दोन तोळे वजनाचे सोन्याचे दागिने हिसकावले. त्यानंतर तो साथीदारासह दुचाकीवरून पळून गेला. हा भाग गर्दीचा आहे. येथे पादचाऱ्यांबरोबरच वाहनांचीही गर्दी असते. त्यातूनही चोरट्यांनी पळ काढला. चोऱ्यांच्या अशा प्रकारांमुळे सकाळी अथवा संध्याकाळी चालण्यासाठी बाहेर पडणाऱ्या नागरिकांमध्ये, विशेषतः महिलांमध्ये भीतीचे वातावरण निर्माण झाले आहे.
लेखकाबद्दलहरिश मालुसरे महाराष्ट्र टाइम्स ऑनलाईन टीममध्ये सिनिअर डिजिटल कंटेंट प्रोड्युसर म्हणून कार्यरत. क्रीडा, राजकीय आणि क्राईम बातम्यांमध्ये विशेष आवड. झी 24 तास आणि टीव्ही9 मराठीसह पत्रकारिता क्षेत्रात 04 वर्षांचा अनुभव.… आणखी वाचा