संबंधित घटना सीसीटीव्ही कॅमेऱ्यात कैद झाली आहे. तीन ते चार हल्लेखोर दोन जणांवर धारदार शस्त्राने सपासप वार करत असल्याचे सीसीटीव्ही कॅमेऱ्यात दिसत आहे. अतिशय वर्दळ आणि रहदारीच्या रस्त्यावर खुलेआम हल्ल्याची घटना घडल्याने हल्लेखोरांना कायदा आणि पोलिसांचा धाक राहिला नसल्याचं दिसत आहे. पोलीस या प्रकरणी काय कारवाई करतात ते पाहणं महत्त्वाचं आहे.

दरम्यान घटनेची माहिती मिळताच सदर बाजार पोलिसांनी घटनास्थळी धावा घेतली. पोलिसांनी घटनास्थळाचा पंचनामा केला. यानंतर मृतदेह शवविच्छेदनासाठी शासकीय सामान्य रुग्णालयात पाठवला. मृतक व्यक्तीचा मृतदेह रक्ताच्या थारोळ्यात पडलेला असल्याने परिसरातील नागरीकांनी घटनास्थळी मोठी गर्दी केले होती.

जालना शहरात गेल्या काही वर्षांपासून खून, लूटमार, अवैध धंदे या सारख्या गुन्ह्यांमध्ये मोठ्या प्रमाणात वाढ झाली आहे. जालन्यात खून म्हणजे रोजची घटना झाली आहे. खूनांच्या घटनांचा इथे सर्वसामान्य नागरिकांना आता विट आला आहे. त्यांना या घटनेचे काहीच वाटत नाही. सहज म्हणतात की रोजचे आहे त्यात काही नवीन नाही. यामुळे पोलिसांवर प्रश्न उपस्थित होत आहेत. गुन्हेगारांना पोलिसांचं भय उरलं नाही का? असा प्रश्न उपस्थित होतोय.

या प्रकरणी पोलिसांनी दोन संशयित आरोपींना ताब्यात घेतले आहे. रुपेश शेळके आणि पवन जाधव यांना सदर बाजार पोलिसांनी ताब्यात घेतले आहे. सदर बाजार पोलीस आणि स्थानिक गुन्हे शाखेचे पथक फरार आरोपीचा शोध घेत आहेत. या हल्ल्यामागील कारण अजून तरी अस्पष्ट असून कौटुंबिक कारणावरून हल्ला झाला असल्याची प्राथमिक माहिती आहे. या प्रकरणी सदर बाजार पोलीस पुढील तपास करत आहेत.