पनवेलमध्ये बेकायदेशीरपणे राहत असलेल्या 5 बांगलादेशियांना पोलिसांनी ताब्यात घेतले त्यांच्यासोबतच सहा जणांनाही अटक करण्यात आली. बागलादेशी नागरिकांकडे भारतीय पासपोर्टही आढळले.
बांग्लादेशी नागरिकांना अटक, भारतीय नागरिकाचे कारनामे
करंजाडे येथील एका अपार्टमेंटवर छापा टाकत पोलिसांनी दोन पुरुष आणि तीन महिलांना ताब्यात घेतले. या प्रकरणात बांगलादेशी नागरिकांना बनावट ओळखपत्रे बनवून देणाऱ्या भारतीय नागरिकालाही पोलिसांनी ताब्यात घेतले आहे.अँटी-ह्युमन ट्रॅफिकिंग युनिटच्या पीएसआय सरिता गुदे यांना मिळालेल्या गुप्त माहितीच्या आधारे, 4 मे रोजी करंजाडे, सेक्टर 6 येथील ब्लू क्रेस्ट को-ऑपरेटिव्ह हाउसिंग सोसायटीमध्ये पोलिसांनी धाड टाकली. तिथे दोन पुरुष आणि तीन महिला राहत असल्याचे आढळले. चौकशीत या व्यक्तींनी खुलासा केला की, काहींनी वैध व्हिसावर भारतात प्रवेश केला, परंतु व्हिसाची मुदत संपल्यानंतरही ते बेकायदेशीरीत्या भारतात राहत होते. तर इतरांनी भारत-बांगलादेश सीमेवरून छुप्या मार्गाने भारतात घुसखोरी केल्याचे कबूल केले.
बांगलादेशी नागरिकांकडे आधार कार्ड, पॅन कार्ड, पासपोर्ट
धक्कादायक बाब म्हणजे हे सर्व बांगलादेशी नागरिक असूनही त्यांनी आधार कार्ड, पॅन कार्ड, मतदार ओळखपत्र आणि तीन जणांनी तर बनावट कागदपत्रांच्या आधारे भारतीय पासपोर्टदेखील बनवले आहे.अन्ना खातून आकाश गाझी (35 धंदा ब्युटीशियन आणि टेलर), आलो खातून इस्लाम गाझी (31, गृहिणी), इस्त्राफिल इस्लाम गाझी (25 धंदा मजूरी), किया आकाश गाझी (21, विद्यार्थिनी), आकाश लतीफ गाझी (40 धंदा रिक्षाचालक) अशी अटक करण्यात आलेल्या बांगलादेशी नागरिकांची नावे असून हे सर्व करंजाडेमध्ये राहत होते. याप्रकरणी पनवेल शहर पोलिस ठाण्यात विविध कलमांनुसार गुन्हा दाखल करण्यात आला असून पनवेल सत्र दिवाणी न्यायालयात हजर केले असता, 9 मे पर्यंत पोलिस कोठडी सुनावण्यात आली आहे.
याकामी पोलिस उपायुक्त अमित काळे यांच्यासह सहाय्यक पोलिस आयुक्त अजयकुमार लांडगे, धर्मपाल बनसोडे, वरिष्ठ पोलिस निरीक्षक पृथ्वीराज घोरपडे यांच्या मार्गदर्शनाखाली पोलिस उपनिरीक्षक सरिता गुडे, महिला पोलिस हवालादार मांडोळे, पोलिस शिपाई चव्हाण, ठाकूर, कोलते, घोनसेकर, म्हात्रे, अडकमोल, हांडे आदीनी कारवाईत सहभाग घेतला होता.