महिला उद्योजकाचा विनयभंग करून तिची दीड कोटीने फसवणूक केल्याप्रकरणी शिवसेना शिंदे गटाच्या नेत्यावर गुन्हा दाखल करण्यात आला आहे. यामुळे राजकीय वर्तुळात खळबळ उडाली आहे.
नेमकं प्रकरण काय?
पोलिसांकडून प्राप्त माहितीनुसार, पीडित महिला हॉटेल व्यावसायिक आहे. डिसेंबर २०२३मध्ये तिची मित्राच्या माध्यमातून काशीकर यांच्यासोबत ओळख झाली. बजानगरमधील भारत लॉनच्या मागे माझे एनएच वन नावाचे हॉटेल आहे. ते बंद आहे. तुम्ही ते सुरू करा,असा प्रस्ताव काशीकर यांनी महिलेला दिला. तीन महिन्यांपर्यंत नफा किंवा नुकसान झाल्यास कोणतीही रक्कम द्यावी लागणार नाही. चवथ्या महिन्यापासून १० टक्के वाटा द्यावा लागेल, असेही ठरले. महिलेने प्रस्ताव स्वीकारला. त्यानंतर महिलेने कर्ज सुमारे दीड कोटी रुपयांचे कर्ज घेतले. हॉटेलमध्ये सुधारणा केली. महिलेने हॉटेल सुरू केले. तिने काशीकर यांना लिखित करारनामा करण्यास सांगितले. काशीकर यांनी टाळाटाळ केली. महिलेला संशय आला. तिने चौकशी केली असता काशीकर यांच्या हॉटेलची जागा ही राहुल वर्मा नावाच्या व्यक्तीच्या नावे लीजवर असल्याचे तिला कळाले.
याचदरम्यान महिलेने तीन महिन्यांपर्यंतचे काशीकर यांना दहा टक्क्याने पैसे (धनादेश) दिले. त्यानंतर काशीकर यांनी महिलेसोबत वाद घालायला सुरुवात केली. हॉटेल बंद करण्याची धमकी दिली. महिला व तिच्याभावाने काशीकर यांची समजूत घालण्याचा प्रयत्न केला असता काशीकर यांनी तिला व तिच्या कुटुंबीयाला पिस्तूल दाखवत ठार मारण्याची धमकी दिली.पोलिस व बड्या राजकारण्यांशी माझे संबंध आहेत. तुला कोणत्याही गुन्ह्यात अडकवेल,असेही काशीकर म्हणाले.
मंगेश काशीकर हे शिवसेना शिंदे गटाचे विदर्भातील महत्त्वाचे नेत आहेत. 2022 मध्ये शिंदे यांनी उद्धव ठाकरेंची साथ सोडल्यानंतर शिवसेना शिंदे गटासोबत काशिकर राहिले. काही आठवड्यांपूर्वीच त्यांची शिवसेना चंद्रपूर लोकसभा संपर्कप्रमुखपदी निवड झाली आहे.
लेखकाबद्दलअविनाश महाजनअविनाश महाजन हे महाराष्ट्र टाइम्सच्या नागपूर आवृत्तीत प्रिन्सिपल करस्पॉडंट आहेत. त्यांना पत्रकारितेत २० वर्षांचा अनुभव आहे. गेल्या १६ वर्षांपासून गुन्हेवार्तांकनाचा अनुभव आहे.… आणखी वाचा