ऍड.शितल शरद भोसले या इंदोरला जाण्यासाठी पश्चिम रेल्वेच्या अवंतिका एक्सप्रेसच्या जनरल डब्यात बसून प्रवास करत होत्या. अवंतिका एक्सप्रेस सकाळी रेल्वे स्थानकाच्या पुढे आल्यानंतर शीतल भोसले आणि डब्यामध्ये प्रवास करत असलेल्या एक महिलेत वाद झाला. वाद आणि बाचाबाची इतकी वाढली की, या वादाचे रूपांतर हाणामारीत झाले. यावेळी शितल भोसले यांच्यावर धारदार वस्तूने वार करण्यात आला. शितल भोसले यात जखमी झाल्या आहेत. शनिवारी ही घटना घडली असून महिलेला मानेवर वार करायचा होता, मात्र तो चुकवल्याने हातावर हा वार झाला, असा आरोप शितल भोसले यांनी केला आहे.

अवंतिका एक्सप्रेस वापी रेल्वे स्थानकात थांबली असता होमगार्डकडे शीतल यांनी मदत मागितली. मात्र मदत मिळाली नसल्याचे त्यांचे म्हणणे आहे. यानंतर घटनेसंदर्भात हेल्पलाइनवर तक्रार नोंदवल्यानंतर वलसाड रेल्वे स्थानकात रेल्वे पोलिसांनी पीडित महिलेवर हल्ला करणाऱ्या एका महिला व पुरुष अशा दोघांना वलसाड रेल्वे स्थानकात ताब्यात घेतले आहे. या हल्ल्यात जखमी झालेल्या शीतल भोसले यांच्यावर प्राथमिक उपचार करण्यात आले आहेत.

ही घटना पालघर लोहमार्ग पोलीस ठाण्याच्या हद्दीत घडली आहे. रविवारी सकाळी शीतल यांनी पालघर रेल्वे स्थानक गाठले. यावेळी पोलिसांनी त्यांचा जबाब नोंदवला आहे. याप्रकरणी दोघांना अटक करण्यात आली असून पालघर लोहमार्ग पोलीस ठाण्यात असून याप्रकरणी गुन्हा दाखल करण्यात आला आहे.