खोल विहीर आणि पाण्याची खोली ३० ते ४० फूट खोल… दुपारी साडेबारा वाजताची वेळी… सोलापुरातील बोरामणी येथे असलेल्या या विहिरीत जवळपास दहा तर बारा शालेय विद्यार्थी पोहत होते. पण अचानकपणे विहीरीचा कठडा घसरला आणि होत्याचं नव्हतं झालं. विहिरीत पोहत असलेल्या विद्यार्थ्यांवर दगड आणि मातीचा ढिगारा पडला. पोहत असलेली काही मुलं पाईपचा सहारा घेऊन बाहेर आले. पण दोन शालेय विद्यार्थी मात्र बाहेर आलेच नाहीत. बाहेर आलेल्या विद्यार्थ्यांनी आरडाओरडा करून आजूबाजूला असलेल्या शेतकऱ्यांना बोलावून घेतले आणि माहिती समोर आली. याबाबतची माहिती मिळताच ताबडतोब पोलीस अधिकारी, अग्निशमन दल अधिकारी आणि दक्षिण सोलापूर तालुक्याचे तहसीलदार किरण जमदाडे घटनास्थळी दाखल झाले. विहिर मोठी असल्याने पाणी देखील मोठ्या प्रमाणात आहे. गेल्या ८ तासांपासून पाणी उपसा करण्याचे काम युद्धपातळीवर सुरू आहे. त्यात लाईटचीही ये जा सुरु असल्याने बचावकार्यात अडथळे आले. बोरामणी येथे नेमकं काय घडलं? आणि दक्षिण सोलापूरचे तहसीलदार किरण जमदाडे नेमकं काय म्हणाले याचा आढावा घेतलाय आमचे प्रतिनिधी इरफान शेख यांनी…