भाजपचे राष्ट्रीय अध्यक्ष जे. पी. नड्डा हे सध्या पुणे दौऱ्यावर आले आहेत. काश्मीरमधील पहलगाम येथील हल्ल्यानंतर जे. पी. नड्डा पुणे दौऱ्यावर असल्यामुळे त्यांच्या या दौऱ्याकडे अनेकांचं लक्ष लागलंय. शनिवारी सकाळीच नड्डांनी पुण्यातील प्रसिद्ध श्रीमंत दगडूशेठ हलवाई मंदिरात जाऊन पूजा आरती केली. यानंतर माध्यमांशी संवाद साधताना नड्डांनी पहलगामच्या भ्याड हल्ल्यातील दोषींना मोठा इशारा दिला. पंतप्रधान नरेंद्र मोदी यांच्या नेतृत्वात दोषींना चोख प्रत्युत्तर देणार असा इशारा त्यांनी दिला. यासाठी देवाचा आशीर्वाद असावा म्हणून गणपती बाप्पाचा आशीर्वाद घेतल्याचं नड्डा यांनी सांगितलं.