शुक्रवारी मंत्री नितेश राणे यांनी दापोली तालुक्यातील अडखळ जेटीच्या कामाची पाहणी केली. यावेळी त्यांनी अडखळ बंदर जेटीचे काम करणाऱ्या संबंधित ठेकेदाराची कानउघडणी केली. मला खोटी माहिती देऊ नका, खोटी माहिती द्याल तर डबल फाईन करेन, असे म्हणत त्यांनी ठेकेदाराला सज्जड दम भरला. अडखळ येथे ड्युटीवर गाड्या पार्किंग केल्याने दोन गटात मोठा राडा झाला होता. यावेळी त्यांनी याठिकाणी गाड्या उभ्या करायला परमिशन कोण देतो? ही बंदर विकास खात्याची अंतर्गत जागा आहे, यावरून त्यांनी बंदरविकास खात्याच्या अधिकाऱ्यांची चांगलीच हजेरी घेतली.

नितेश राणे अधिकाऱ्यांना पुढे म्हणाले, तुम्ही याकडे लक्ष दिले नाहीत तर तुम्हाला घरात पाठवावे लागेल. यामुळे जिथे वरती कोणी गाड्या पार्किंग केल्यास मी स्वतः येऊन या गाड्या सगळ्या समुद्रात लोटून टाकीन, अशा शब्दांत सज्जड दमही भरला. यावेळी घोषणा देणाऱ्या कार्यकर्त्यांनाही राणेंनी सुनावले. ‘मी याठिकाणी कोणतीही हवा भरायला आलो नाही, मी माझ्या खात्याच्या अधिकाऱ्यांशी बोलतो आहे, त्यामुळे जरा थांबा,’ असे राणे म्हणाले.

नितेश राणे यांची पाजपंढरी येथील श्रीराम मंदिरात हिंदू जनजागृतीची धर्मसभा होणार आहे त्यासाठी ते दापोली दौऱ्यावर आले आहेत. यावेळी त्यांनी आपल्या बंदर विकास खात्याचे अंतर्गत येणाऱ्या दोन जेटींची पाहणी केली आहे.

अडखळ येथे जेटीवर अवैध गाड्यांचे पार्किंग करण्यावरून दोन गटात हाणामारी झाली. यासाठी जबाबदार असलेल्या आपल्या खात्याचे अधिकाऱ्यांवर कारवाई केली जाईल, असाही इशारा नितेश राणेंनी दिला आहे. यावेळी एका कार्यकर्त्यांनी शेजारीच अवैधरित्या उत्तराचे काम चालला आहे, ही बाब त्यांच्या लक्षात आणून दिली. यावेळी त्यांनी तातडीने बंदर विकास खात्याच्या अधिकाऱ्यांकडून माहिती घेत ही जागा बंदर विकास खात्याच्या हद्दीत आहे का? अधिकाऱ्यांकडून याचे उत्तर नाही मिळत. आज मला चुकीची माहिती देऊ नका, माझ्या खात्याच्या हद्दीतील जागेत काही अवैध सुरू असेल, तर मला सांगा अशी स्पष्ट भूमिका मंत्री नितेश राणे यांनी मांडली आहे.