देशातील पहिल्या आधार कार्डधारक म्हणून गौरव मिळवलेल्या श्रीमती रंजनाबाई सदाशिव सोनवणे रा. टेंभळी, ता. शहादा, जि. नंदुरबार यांना जिल्हाधिकारीडॉ. मित्ताली सेठी यांच्यामुळे ‘मुख्यमंत्री माझी लाडकी बहिण’ योजनेचा लाभ मिळाला आहे. भारताचे तत्कालिन पंतप्रधान डॉ. मनमोहन सिंग यांच्या हस्ते देशातील पहिले आधार कार्ड मिळवण्याचा मान श्रीमती सोनवणे यांना मिळाला होता.

रंजनाबाई यांनी सदर योजनेअंतर्गत ‘नारी शक्ती दूत’ अ‍ॅपच्या माध्यमातून अंगणवाडी सेविकेमार्फत नोंदणी केली होती. त्यासाठी त्यांनी आधार कार्ड, बँक पासबुक (बँक ऑफ इंडिया, लोणखेडा शाखा) व इतर आवश्यक कागदपत्रे सादर केली होती. मात्र, योजनेची रक्कम त्यांच्या खात्यात जमा होत नसल्याचे निदर्शनास आले.

पुढील चौकशीत असे स्पष्ट झाले की त्यांचे आधार कार्ड हे अंधेरी येथील आयडीबीआय बँकेशी संलग्न असून, त्यामुळे लाभाची रक्कम त्या खात्यात जमा झाली होती. यासंदर्भात बँक ऑफ इंडिया आणि आयडीबीआय बँकेतील खात्यांची पडताळणी करण्यात आली.

प्रकरणाची दखल घेऊन जिल्हाधिकारी डॉ. मित्ताली सेठी यांच्या मार्गदर्शनाखाली तहसिलदार दीपक गिरासे यांच्या तालुकास्तरीय यंत्रणांनी योग्य कार्यवाही केली. परिणामी, सोमवारी २१ एप्रिल २०२५ रोजी श्रीमती रंजनाबाई यांना आयडीबीआय बँकेकडून योजनेअंतर्गत लाभांचा रु. १३,५००/- चा धनादेश प्रदान करण्यात आला.

या प्रक्रियेमुळे ‘लाडकी बहिण’ योजनेचा लाभ प्रत्यक्षात देशातील पहिल्या आधारकार्ड धारक महिलेला मिळाला आहे. रंजनांच्या कुटुंबाचे वार्षिक उत्पन्न हे अत्यल्प आहे. त्यामुळे रंजना या मजुरी करतात आणि मुलांच्या आणि कुटुंबाच्या जबाबदारीचा भार वाहतात.