बाळाला चालता यावं म्हणून डॉक्टरांनी महागडं इंजेक्शन दिलं, पण त्यानंतर मात्र चिमुकलाच दगावला. कोणताही आजार नसताना केवळ चालता येत नसल्याने तीन वर्षाच्या बाळाला डॉक्टरांकडे नेण्यात आलं. ट्रीटमेंटसाठी चिमुकल्याला 80 हजारांचं इंजेक्शन द्यावं लागेल असं सांगून खाजगी रुग्णालयात दाखल करण्यात आलं.., मोलमजुरी करणाऱ्या आई वडिलांनी व्याजाने पैसे काढून थोडी रक्कम ॲडव्हान्स म्हणून दिली.. पालकांची परिस्थिती नसल्याने रुग्णालयानेही तीस हजार रुपये कमी केले.. पण इंजेक्शन देताना भूल दिल्यापासून चिमुकला हर्षल धाडे शुद्धीतच आला नाही, त्यानंतर २० एप्रिल रोजी डॉक्टरांनी त्याला मृत घोषित केलं. दुःखाचा डोंगर कोसळलेल्या कुटुंबाने रुग्णालयाविरोधात संताप व्यक्त केला. मृत्यूचं कारण समजत नाही तोवर मृतदेह ताब्यात घेणार नाही, अशी भूमिका नातेवाइकांनी घेतली..