गेल्या काही दिवसांत मराठी विरुद्ध अमराठी असा वाद वाढत असल्याचे दिसून येत आहे. काही दिवसांपूर्वी राष्ट्रीय स्वयंसेवक संघाचे नेते भय्याजी जोशी यांनी घाटकोपर येथे आयोजित एका कार्यक्रमात घाटकोपर परिसराची भाषा ही मराठी नसून गुजराती असल्याचे म्हटले होते. जाणूनबुजून मराठी भाषेचा आणि मराठी माणसांचा अपमान करण्याच्या बऱ्याच घटना अलिकडच्या काळात दिसत असतानाच असाच एक प्रकार मुंबईचे उपनगर असलेल्या घाटकोपर परिसरात घडला. येथील एका Jain, Gujrati, आणि Marwadi बहुल रहिवासी सोसासटीत एका मराठी कुटुंबाला, ते मांसाहार करतात म्हणून अपमानास्पद वागणूक देण्यात आली.

या सोसायटीत राहणाऱ्या शाह नावाच्या एका व्यक्तीने संबंधित कुटुंबाला, ‘मराठी आदमी गंदा है, तुम मच्छी मटन खाते हो’, असे म्हटले. या रहिवासी सोसायटीत केवळ चार मराठी कुटुंब असून बहुसंख्य कुटुंबं Jain, Gujrati, आणि Marwadi आहेत. गेल्या काही दिवसांपासून मांसाहार करण्यावरुन अमराठी रहिवासी मराठी कुटुंबांना त्रास देत असल्याची बातमी मनसेच्या कामगार सेनेचे उपाध्यक्ष राज पार्टे यांना समजताच ताबडतोब ते आपल्या कार्यकर्त्यांसोबत त्या इमारतीत दाखल झाले. सोसायटीत शिरत शाह नावाच्या व्यक्तीने मराठी कुटुंबाच्या केलेल्या अपमानाचा जाब त्यांनी सोसायटीच्या गुजराती आणि जैन कुटुंबीयांना विचारला. तेव्हा शाह नावाची व्यक्ती समोर आली नाही. तर सोसायटीतील इतर रहिवाशी “आम्ही मराठी विरुद्ध अमराठी भेदभाव करत नाही. मराठी कुटुंबांच्या मांसाहार खाण्यावर आम्ही कोणतेही बंधन आणलेले नाही” अशी सारवासारव करताना दिसले.