महाराष्ट्र टाइम्स.कॉम | Updated: 5 Apr 2025, 5:57 pm
Mazgaon Court on Dhananjay Munde Petition : धनंजय मुंडे यांना माझगाव कोर्टाकडून मोठा धक्का बसला आहे. कारण कोर्टाने धनंजय मुंडे यांची याचिका फेटाळली आहे. कोर्टाचा निर्णय हा करुणा शर्मा यांच्या बाजूने लागला आहे. माझगाव कोर्टाने कुटुंब न्यायालयाचा निर्णय कायम ठेवला आहे. या निकालानुसार धनंजय मुंडे यांना दर महिन्याला करुणा शर्मा यांना 2 लाख रुपयांची पोटगी देणं अनिवार्य असेल.
माझगाव कोर्टाने दोन्ही बाजूचा युक्तिवाद ऐकून घेतल्यानंतर आता निकाल जाहीर केला आहे. हा निकाल धनंजय मुंडे यांना मोठा धक्का देणारा आहे. कारण माझगाव कोर्टाने वांद्रे कुटुंब न्यायालयाचा निर्णय कायम ठेवला आहे. माझगाव कोर्टाने धनंजय मुंडे यांची याचिका फेटाळत कुटुंब न्यायालयाचा निर्णय कायम ठेवला आहे. त्यामुळे हा निकाल करुणा शर्मा यांच्याच बाजूने लागल्याचं मानलं जात आहे.
खरंतर वांद्रे कुटुंब न्यायालयाने निकाल दिल्यानंतर धनंजय मुंडे यांनी माझगाव सत्र न्यायालयात धाव घेतली होती. या प्रकरणी दोन वेळा सुनावणी पार पडली. याआधी पार पडलेल्या सुनावणीत धनंजय मुंडे यांनी करुणा शर्मा यांच्यासोबत आपलं लग्न झाला नसल्याचा युक्तिवाद केला. असं असलं तरी त्यांनी करुणा शर्मा यांच्यापासून दोन मुलांना जन्म झाला. त्या दोन्ही मुलांची जबाबदारी आपण स्वीकारली असल्याचं धनंजय मुंडे यांनी न्यायालयात मान्य केलं होतं. पण आपलं अधिकृतपणे करुणा शर्मा यांच्यासोबत लग्न झालं नसल्याचा युक्तिवाद धनंजय मुंडे यांचा वकिलांकडून करण्यात आला होता.
न्यायालयात काय-काय घडलं?
दरम्यान, माझगाव सत्र न्यायालयात आज पार पडलेल्या सुनावणीवेळी करुणा शर्मा यांनी अतिशय महत्त्वाचे दस्तावेज सादर केले. यामध्ये पासपोर्ट रेशन कार्डमध्ये तसेच स्वीकृती पत्र आणि अंतिम इच्छापत्र यांच्यात करुणा मुंडे यांचा पहिली पत्नी असा उल्लेख धनंजय मुंडे यांनी केल्याचं म्हटलं आहे. तसेच स्वीकृती पत्रात धनंजय मुंडे यांनी स्पष्ट म्हटलं आहे की, कुटुंबीयांच्या दबावामुळे मी दुसरं लग्न केलं आहे. पण मी करुणा शर्मा आणि मुलांचादेखील सांभाळ करेन. त्यांचा पहिली पत्नी म्हणून मी स्वीकार करेन, असं स्वीकृती पत्रात नमूद करण्यात आलं आहे. या कागदपत्रांचे निरीक्षण करुन आणि दोन्ही बाजूंचा युक्तिवाद ऐकून माझगाव सत्र न्यायालयाने करुणा शर्मा यांच्या बाजूने निकाल दिला.
धनंजय मुंडे यांच्याकडे आता पर्याय काय?
माझगाव सत्र न्यायालयाने धनंजय मुंडे यांची याचिका फेटाळली आहे. तसेच वांद्रे कुटुंब कोर्टाचा निकाल कायम ठेवला आहे. यानंतर आता धनंजय मुंडे या निकालाच्या विरोधात मुंबई हायकोर्टात आव्हान देऊ शकतात. हायकोर्ट या प्रकरणात काय निकाल देतं? ते पाहणं देखील महत्त्वाचं आहे. दरम्यान, करुणा शर्मा यांना धनंजय मुडे यांनी 2 लाख रुपये पोटगी देण्याचा निर्णय न्यायालयाने दिला आहे. पण आपल्याला आणखी पोटगी मिळावी, अशी करुणा शर्मा यांची मागणी आहे. त्यामुळे या मागणीसाठी त्या पुन्हा न्यायालयात याचिका दाखल करण्याची शक्यता आहे.